МОНГОЛЫН ГУРВАН ЖҮДОЧ ӨӨР УЛСЫН НЭР ДЭЭР ЗОДОГЛОНО

Монголын гурван шилдэг жүдочийг Арабын нэгдсэн Эмират улсаас өөрийн нэр дээр барилдуулах санал иржээ. Тодруулбал, эрэгтэйчүүдийн 66 кг-д Д.Төмөрхүлэг, 81 кг-д Н.Дагвасүрэн, +100 кг-д Б.Тэмүүлэн нар АНЭУ-ын нэрийн өмнөөс тэмцээнд оролцох легионер тамирчид болох аж. Тэд ирэх гуравдугаар сараас гэрээ хэлцлээ дуусгаж, тавдугаар сараас тус улсын нэрийн өмнөөс тэмцээнд оролцож эхлэх юм байна.

Дашрамд мэдээлэхэд, Монголын шилдэг жүдочид гадаадад уригдсан хэд хэдэн тохиолдол бий. Тодруулбал, эмэгтэйчүүдийн 48 кг-ын жингийн шилдэг тамирчин Г.Отгонцэцэг Казахстаны нэрийн өмнөөс барилдан, олимп, дэлхийн аваргын хүрэл медаль хүртсэн юм. Мөн Азербайжаны жүдо бөхийн шигшээ баг өнгөрсөн жил 48 кг-д Э.Базаррагчаа, 52 кг-д П.Буянхишиг, 57 кг-д М.Ичинхорлоо нартай албан ёсоор гэрээ байгуулсан билээ.