В.ОРБАН ЕХ-НЫ ДҮРВЭГСДИЙН БОДЛОГЫГ ШҮҮМЖИЛЛЭЭ

Унгар улсын ерөнхий сайд Виктор Орбан Болгар улсын нийслэл София хотод хийсэн айлчлалынхаа үеэр ЕХ-ны баримталж байгаа цагаачлалын бодлогыг хүчтэй шүүмжиллээ. Тэрээр мөн Брюсселийн журмыг эсэргүүцэж байгаагаа илэрхийлээд "ЕХ дүрвэгсдийг зөвхөн тараан байрлуулах асуудалд олны анхаарлыг татах бус, хилийн хамгаалалтын асуудалд ч мөн олон нийтийн анхаарлыг хандуулах шаардлагатай. Цагаачлал бол улс орны аюулгүй байдалд сөргөөр нөлөөлдөг зүйо. Энэ нь бидний амьдрах хэв маяг болоод христийн шашинтнуудын соёлд ч хамааралтай" гэж Болгарын ерөнхий сайд Бойко Бориссовтой уулзах үеэрээ мэдэгдсэн байна. Одоогийн байдлаар Болгар цагаачлалын асуудлаар Унгар улстай санал нэгтэй байгаагаас гадна ЕХ-г шүүмжлэн, Турк улсын хилийн хамгаалалтаа сайжруулаад байгаа юм. Орбан ням гарагт өөрийн улсын иргэдэд зориулан "улс орны байдал" илтгэлийг тавихдаа Европ руу ирэх дүрвэгсдийн тоо нэмэгдэж байгаагаас болгоомжлохыг анхааруулаад "Европын тэнгэрт бараан үүл хурж байна. энэ хэвээрээ үргэлжлэх юм бол Европын томоохон хотууд бүгд лалын шашинтай болох болно. Үндэстнүүд байхаа больж, Европчууд эзлэгдэж байгаагаа ухараахаас өмнө Барууны орнууд үгүй болно. Энэ аюулыг Брюссел, Берлин, Парисын улс төрчид бидэнд авчирч байна. Тэд өөрсдийн улсыг цагаачдын улс болгоод зогсохгүй Унгар улсыг ч мөн өөрсдийн бодлогыг хэрэгжүүлэхийг шаардан христийн соёл, өвийг үгүй хийж, лалын шашны төв болгох алхмыг хийж байна" гэж хэлсэн юм.