Э.СОДНОМПИЛЖЭЭ “ДЭЛХИЙН ЦОМ”-Д ГУРАВ ДАХИА ТҮРҮҮЛЭВ

Арабын нэгдсэн Эмират улсын Дубай хотноо пауэрлифтингийн Дэлхийн цомын аварга шалгаруулах тэмцээн эдгээр өдрүүдэд зохион байгуулагдаж байна. Ес дэх удаагийн тус тэмцээнд 40 орны 400 орчим тамирчин оролцож буй юм. Тус тэмцээний 97кг-ийн жинд өрсөлдсөн олимпийн наадмын хүрэл медальт, Монгол улсын гавьяат тамирчин Э.Содномпилжээ алтан медаль хүртжээ. Тэрбээр 220 кг өргөснөөр, гурав дахь удаагаа "Дэлхийн цом"-д түрүүлж байна.

Манай тамирчны хувьд өнгөрсөн оны гуравдугаар сард Арабын нэгдсэн Эмират улсын Дубай хотноо зохион байгуулагдсан пауэрлифтингийн "Дэлхийн цом"-ын аварга шалгаруулах тэмцээнээс алтан медаль хүртсэн. Мөн оны тавдугаар сард Унгар улсын Эгер хотноо болсон Дэлхийн цомын тэмцээнд гайхалтай амжилт үзүүлж, аваргын алтан медалийн эзэн болсон юм. Энэ жинд Киргизстаны Жаргалбек Оросбаев 200 кг-ыг өргөж мөнгө, нутгийн тамирчин Абдалла Алнакби 185 кг-ыг өргөсөн амжилтаар хүрэл медаль хүртжээ.