Г.АЛТАНБАГАНА “ИХ ДУУЛГА”-ААС АНХНЫ МЕДАЛИА ХҮРТЛЭЭ

"Дюссельдорф-2018" Олон улсын жүдо бөхийн холбооны "Их дуулга" тэмцээн энэ сарын 23-25-ны өдрүүдэд Германы Дюссельдорф хотноо болж өнгөрлөө. Тэмцээний сүүлийн өдөр уламжлал ёсоор хүнд жингийн буюу эрэгтэйчүүдийн 90кг, 100кг, +100кг, эмэгтэйчүүдийн 78кг, +78кг-ийн барилдаанууд явагдаж, медальтнууд тодров.

Эдгээр жинд манайхаас таван жүдоч зодоглосноос эрэгтэйчүүдийн 90 кг-ийн жинд ОУХМ Г.Алтанбагана хүрэл медаль хүртжээ. Тэрбээр Доминикан, Японы бөхчүүдийг ялж, шилдэг наймд шалгарсан. Улмаар шилдэг наймд ОХУ-ын жүдоч Михайл Игольниковтай барилдаж, ялагдал хүлээсэн юм.

Ингээд дагах барилдаанд Латвийн Дэвис Дудаг цэвэр, хүрэл медалийн төлөө Тажикстаны Комроншох Устопириёныг вазаригаар ялж "Их дуулга" ангиллын тэмцээнээс анхны медалиа хүртлээ.

Ингэснээр тус тэмцээнээс манай дөрвөн залуу тамирчин "Их дуулга"-ын анхны медалиа авч, медалийн тоогоороо гуравдугаар байрт шалгарлаа.