Өрнөд бүсийн Финалын цуврал өнөөдөр Техас мужийн Хьюстон хотод эхэллээ. Улиралд амжилтаараа бүсээ тэргүүлэн, талбайн давуу талыг олж аваад байсан Рокетс гэртээ цувралыг нээсэн юм.
Тоглолтын эхлэлийг Рокетс тэр дундаа Жэймс Харден сайн тавьж, онооны тэргүүллийг авсан ч 2-р үеэс эхлэн Кевин Дурантын дараалласан довтолгоонууд амжилттай болж, зочид тэргүүллийг авсан юм. Улмаар шийдвэрлэх 2-р хагаст ч Уорриорс илүү тоглолт үзүүлж чадсанаар Рокетсоос талбайн давуу талыг нь булаан авч, цувралыг 1:0 харьцаатай тэргүүлж эхэллээ.
Тус тоглолтонд Кевин Дурант 37 оноогоор багаа тэргүүлсэн бол Клэй Томпсон 28 оноо, Стефен Көрри 18 оноогоор багтаа тус хүргэлээ.
Харин талбайн эздээс Жэймс Харден 41 оноо авсан бол Крис Пол 23 оноо, 11 самбар, Эрик Гордон 15 оноог авсан ч энэ нь хожил байгуулахад хангалттай байсангүй.
Дурант энэ тоглолтонд авсан 37 онооныхоо 27-г Isolation буюу Нэгийн эсрэг нэг тоглолтоор авчээ.
Харин Жэймс Харден лигийн түүхэнд 40-өөс дээш оноог, цувралын эхний тоглолт бүртээ авсан анхны тоглогч боллоо.
Цувралын 2 дах тоглолт мөн Рокетсын талбайд ирэх пүрэв гарагийн өглөө 09:00 цагаас явагдах хуваарьтай юм.
Сэтгэгдэл (0)
Сэтгэгдэл бичигдээгүй байна