БНТУ-ын Истанбул дахь Консулын газрын дэд консул Б.Баттүшиг, жолооч С.Эрдэнэбаяр нар ХБНГУ-ын Дрезден хотын гаалиар их хэмжээний хар тамхи зөөвөрлөх явцдаа баригдан дэлхийн нийтийн чихийг соотойлгож байна. Энэ нь ганц удаагийнх бус гэх ч мэдээлэл бий.
Монгол Улсыг дэлхийд суртчлах, оршин суугаа иргэдийн эрх ашгийг хамгаалах үүрэгтэй тангараг өргөсөн дипломатууд ийнхүү буруу замаар будаа тээж шившиг тарьсан баримтууд шил дараалан гарч ирлээ.
Монгол Улсаас БНХАУ-ын ӨМӨЗО-ны Хөххотод суугаа Ерөнхий консул Д.Мөнх-Эрдэнэ нь урд хөршид гэмт хэрэгт холбогдсон тухай мэдээлэл ирэв. Тэрбээр Хөххот дахь Ерөнхий консулаар ажиллаад таван жил болж байгаа бөгөөд Монголоос автомашин дамлаж хятад иргэдэд зарж асуудал үүсгэжээ.
Улмаар ДТГ-ын дипломат ажилтан, албан хаагчид суугаа орондоо нэг удаа татваргүйгээр автомашин оруулах эрхийг эдэлдэг аж. Үүнийг Д.Мөнх-Эрдэнэ овжиноор ашиглаж тансаг зэрэглэлийн зургаан автомашиныг хятад иргэдэд борлуулсан баримт бидэнд байна. Тэрбээр 2016 оны 7-р сард Монголоос “Mersedes Benz Maybach” маркийн автомашинд А -1234 дипломат дугаар авч хилээр гарган хятадын иргэн Дэн Жанжуд шилжүүлжээ.
Эхнийх нь наймаа амжилттай болсон Ерөнхий Консул дараагийнхаа үйлдлийг шуурхайлж мөн оны наймдугаар сард “Range Rover” маркийн автомашиныг Замын-Үүдийн боомтоор гаргаж Эрээний бизнес эрхлэгч Сайзанд шилжүүлжээ.
Ерөнхий консул Д.Мөнх-Эрдэнийн гуравдахь том наймаа нь 2018 оны 4-5-р сард “Lexus -570” маркийн хоёр ширхэг автомашинд дипломат А17889, А9901 дугаарыг зүүж хятад иргэдэд хууль бусаар худалдсан гэх асуудлаар шалгагдаж байна. Ерөнхий консулын гараар орж ийнхүү урд хөршид зарагдсан автомашинаар хууль бусаар эд зүйлс, иргэдийг зөөдөг болсныг Эрээн хотын хил, гаалийн ажилтнууд байнга анхааруулдаг байжээ. Тийм ч учраас БНХАУ-ын шалган нэвтрүүлэх байгууллагууд сэжиг авч өнгөрсөн жилээс эхлэн Бээжин дэх ЭСЯ, Хөххот дахь ЕКГ, Эрээн дахь КГ-ын автомашинуудыг хилээр орж гарах үед нь нарийвчлан шалгадаг болсон байх юм.
Монгол Улсын дипломат дугаартай автомашиныг худалдан авсан иргэдийг 2018 оны 11-р сарын 30-нд БНХАУ-ын хуулийн байгууллагаас хомроглон баривчилсан байдаг. Тэд өнөөг хүртэл суллагдаагүй, торны цаана шалгуулж байгаа ажээ.
Д.Мөнх-Эрдэнийн гараар орсон “Mersedes Benz Maybach” автомашиныг худалдан авсан хэргээр хоригдож буй Вао Чин Сунгийн эхнэр Монгол Улсын Ерөнхийлөгч, Ерөнхий сайд, АТГ-т өргөдөл гаргажээ. Тухайн эмэгтэй өргөдөлдөө Ерөнхий консулын хууль бус наймааны золиосонд нөхрийгөө хэлмэгдсэн гэж үзэж байгаагаа илэрхийлж, Д.Мөнх-Эрдэнэд хариуцлага тооцохыг хүсчээ.
Ерөнхий консулын гараар нийтдээ зургаан автомашин урд хөршлүү хууль бусаар гарсан бөгөөд эдгээрээс дөрвөн автомашиныг урд хөршийн Гаалийн цагдаагийн газар хураан авсан бол хоёр автомашиныг Ерөнхий консул Д.Мөнх-Эрдэнэ өөрийн амьдарч байгаа байрныхаа гражид хав дарсан гэх мэдээллийг эх сурвалжууд бидэнд өглөө.
Н.ӨНӨРЦЭЦЭГ
Сэтгэгдэл (0)
Сэтгэгдэл бичигдээгүй байна