ИНФИНИТИ ЭМНЭЛЭГТ ХӨГШРӨЛТИЙН ЭСРЭГ УТАС СУУЛГУУЛСАН НЬ АРЬСЫГ НЬ ЦООЛОН ГАРЧ ИРЖЭЭ

Инфинити гоо сайхны эмнэлэгт хөгшрөлтийн эсрэг, нүүрний арьс өргөх утас суулгуулсан эмэгтэй манай редакцид хандсан юм. Тэрбээр өнгөрсөн тавдугаар сард энэ үйлчилгээг авсан бөгөөд нүүрэнд нь өргөстэй 20 утас суулгасан хэмээн хоёр сая төгрөгийн төлбөр авсан байна. Гэвч хэдхэн хоногийн дараа нэг үзүүр нь нүүрний арьсыг цоолон гадагш гарч ирсэн бол, бас нэг утасны үзүүр завж хэсгийн дотор тал руу товойжээ.

Тухайн үед нь Инфинити эмнэлэгт эргэн хандахад “Маш хүчтэй юм хазсан, нүүрээ хамаагүй хөдөлгөснөөс болж ийм зүйл болсон байна” хэмээн үйлчлүүлэгч эмэгтэйг буруутгажээ. Гэвч тухайн эмэгтэй АШУҮИС-ийн Шүд, эрүү нүүрний мэс заслын багш нар болон өөр гоо сайхны эмнэлгийн эмчид үзүүлэн зөвлөгөө авахад, “утсыг суулгахдаа техникийн алдаа гаргасан” гэдгийг хэлсэн байна.

Инфинити эмнэлгийн нүүрний арьс өргөх утас суулгах үйлчилгээний хөлс 1,5-2,5 сая төгрөгийн үнэтэй байдаг аж.

Үйлчлүүлэгч эмэгтэй 45 настай бөгөөд өсвөр насандаа дөрвөн араагаа авахуулж байжээ. Үүнээс үүдэн завж орчимд хонхойн, үрчлээ үүссэнээ эмчлүүлэх зорилгоор Инфинити эмнэлэгт очсон байна.