Б.Содномдаржаа, Т.Чимгээ нарыг эрүүдэн шүүсэн хэргээр Б.Хурц нарын есөн хүнийг шалгаж байгаа билээ. Энэ хэрэг шүүхэд шилжсэн бөгөөд өнөөдөр Төв аймагт урьдчилсан хэлэлцүүлэг нь боллоо. Ингээд гэм бурууг шүүх хурал долоодугаар сарын 23-ны өдрийн 10 цагт болохоор тов гарлаа.
Энэ урьдчилсан хэлэлцүүлэгт Б.Содномдаржаа, Т.Чимгээ, С.Зориг агсны гэргий Б.Булган өмгөөлөгчийн хамт, Б.Хурц нарын есөн хүн оролцсон гэх мэдээлэл байна.
Б.Хурц нарын 9 хүнийг хуучин эрүүгийн хуулийн 133.1, 251.1-д зааснаар яллах дүгнэлттэй шүүхэд шилжүүлсэн байна.
Тухайн зүйл ангиуд нь,
133 дугаар зүйл.Гүйцэтгэх ажлын тухай хууль тогтоомж зөрчих
133.1.Гүйцэтгэх ажлын тухай хууль тогтоомжоор хориглосон үйл ажиллагаа явуулсан бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ.
251 дүгээр зүйл. Эрүү шүүлт тулгах
251.1.Хэрэг бүртгэгч, мөрдөн байцаагч хүч хэрэглэж буюу хүч хэрэглэхээр заналхийлэх, тарчилган зовоох, тохуурхан даажигнах, хуурч мэхлэх зэрэг хууль бус арга хэрэглэж мэдүүлэг өгөхийг албадан эрүү шүүлт тулгасан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасч таван жил хүртэл хугацаагаар хорих ял шийтгэнэ гэж заажээ.
ТЕГ-ын дарга асан Б.Хурцаас гадна Улсын Ерөнхий прокурорын орлогч асан Г.Эрдэнэбат, ТЕГ-ын мөрдөгч О.Бархасбадь, Ж.Мөнхгал, С.Баяр, Ү.Отгонбаяр, С.Эрдэнэбат, ШШГЕГ-ын ажилтан Э.Өлзийбаяр, О.Бямбажав нар нэр холбогджээ.
Сэтгэгдэл (0)
Сэтгэгдэл бичигдээгүй байна