Хойд Солонгосын эрх баригчид "Дайны хэнээтэн" хоч өгсөн АНУ-ын Ерөнхийлөгчийн Үндэсний аюулгүй байдлын зөвлөх Жон Болтон Украйнд айлчилж байна. Украйн дахь АНУ-ын Элчин сайдын яам Twitter хуудсандаа "Үндэсний аюулгүй байдлын зөвлөх Жон Болтоныг Киевт ахин угтаж байгаагаа баяртай байна!" гэж бичсэн байжээ.
Энэхүү айлчлал нь АНУ-ын зүгээс Украйны тусгаар тогтнол ба газар нутгийн бүрэн бүтэн байдлыг дэмжиж байдгийн илрэл гэдгийг онцолсон байна. Гэвч зарим шинжээч энэхүү айлчлалын гол зорилго нь Украйны онгоцны хөдөлгүүр үйлдвэрлэдэг "Мотор Сич" компани гэж шууд хэлжээ.
"Мотор Сич" компанийн хөдөлгүүрүүдийн гол худалдан авагч нь ОХУ байсан. Гэвч Крымийн асуудал, Донбассын дайнаас болоод тийш нь хөдөлгүүр худалдахыг хориглосон. Ийм нөхцөлд Мотор Сич компани нь худалдан авагчгүй болсноор дампуурч магадгүй тун хүнд байдалд ороод байгаа юм. Харин Хятадын хоёр компани "Мотор Сич"-ийн хувьцааны 50 хувийг худалдан авсан бөгөөд одоо Украйны Засгийн газар үүнийг дэмжиж баталгаажуулах л үлдээд байгаа. Хэрэв ингэвэл "Мотор Сич" нь дампуурлаас аврагдах төдийгүй Хятадаас ирэх баталгаатай захиалгатай болж, өндөр түвшний мэргэжилтнүүдээ хадгалан алдалгүй үлдээгээд, цаашдаа хөгжих боломжтой болно гэж үзэж байгаа.
Нөгөө талаас Хятад нь онгоц, нисдэг тэрэгний орчин үеийн хөдөлгүүр үйлдвэрлэх технологийг өөрийн болгож, энэ чиглэлээр Орос, Европ, Америкаас хоцрогдлоо богино хугацаанд нөхөх боломжтой болох юм. Хятадтай худалдааны болон бусад талаар сөрөн тулж байгаа Америкийн хувьд энэ бол байж боломгүй зүйл. Иймээс энэхүү худалдан авалтыг хэзээ ч зөвшөөрөхгүй гэнэ. Жон Болтоны энэ удаагийн айлчлалын гол зорилго нь Хятадтай хийж байгаа энэхүү наймааг цуцлуулах явдал гэдэг дээр цөөнгүй шинжээчид санал нийлжээ.
Сэтгэгдэл (0)
Сэтгэгдэл бичигдээгүй байна