Хятадын Хэнань мужийн Жэнжоу хотод амьдардаг залуу найз бүсгүйнхээ үнэнчийг шалгах гэж хүн хөлсөн аваад эцэстээ өөрөө, найз бүсгүйн хамт олныг үймүүлсэн хэрэгт унасан тухай "South China Morning Post" сонин мэдээлжээ.

Эргэлзсэн залуу интернэтээс хосуудын үнэнч байдлыг шалгах үйлчилгээ үзүүлдэг Ян гэгч өдөөн хатгагчийг олсон аж. Улмаар түүнд Сун гэдэг найз бүсгүйнхээ талаарх бүх мэдээллийг өгч, амрагийн харилцаатай болох гэж оролдохыг даалган хөлсөлжээ. Бүсгүй нь татгалзсан хариу өгвөл өөрт нь үнэнч гэдгийг баттай мэдэж авах байсан гэнэ.

Ингээд Ян гэгч нь "WeChat" –аар Сунтэй удаан хугацааны туршид ярилцаад романтик орчинд уулзахаар болзоонд урьж. Гэвч бүсгүй татгалзсан хариу өгөхөд Ян нь уурлан, чатаар бүсгүйг үгээр дайрч, доромжилж эхэлсэн байна. Үүний дараа Сун нь өөрийнх нь утас, хаяг, паспортын дугаар зэргийг хаанаас олж мэдсэн талаар лавлаж. Хариуд нь Ян өөрийгөө "интернэт цагдаа", бүсгүйн тухай төдийгүй хотын бүх оршин суугчдын талаарх мэдээлэл өөрт нь бий гэж сайрхсан юм байна.

Үүний дараа Сун чатынхаа скриншотыг тэр чигээр нь олон нийтийн сүлжээнд байршуулахад Ян сандарч өөрийгөө ямар хүн болохыг хэлээд мэдээллээ устгахыг хүссэн ч татгалзаж. Төд удалгүй Суны мэдээг хот даяар олж мэдээд олон нийтийн сүлжээгээр ихээхэн хэрүүл маргаан дэгдсэн. Олныг хамарсан хэрүүлийг цагдаагийн газар бас анхааралдаа авч мөрдөн байцаалт эхлүүлжээ. Мөрдөн байцаалтын явцад хэргийн эзэн гурвыг саатуулан олон нийтийн сүлжээгээр хэрүүл маргаан дэгдээд олныг үймүүлсэн ял тулгасан гэнэ. Одоогоор хосуудын үнэнч байдлыг шалгагч эрийг шүүх хурал болтол шоронд хорьж, харин хосуудыг гадуур байцааж байгаа аж.