2020 онд болох Америкийн Ерөнхийлөгчийн сонгууль хэзээ ч байгаагүй их өрсөлдөөн, хэрүүл маргаантай болох төлөвтэй байна. Америкийн Конгрессын төлөөлөгчдийн танхим дах Ардчилсан намын олонх Ерөнхийлөгчийнхөө хүрээнд тагнуул тавьж, Украйны Ерөнхийлөгчтэй утсаар ярихдаа хууль бус шаардлага тавьсан гэдэг үндэслэлээр импичмент зарлах ажиллагааг эхлүүлэхээр болсон. Тэгвэл саяхнаас сонгуулиар Ардчилсан намаас гол нэр дэвшигч болно гэж үзэж байгаа Жозеф Байдены туслахууд Америкийн гол ТВ сувгуудын удирдлагуудад хандан Трампын өмгөөлөгч Рудольф Жулианыг эфирт урьж оролцуулахгүй байх шаардлага хүргүүлж эхэлсэн тухай "The New York Times" сонин мэдээлсэн байна.
Байдены сонгуулийн штабын ажилтнууд энэхүү шаардлагыг "ABC", "CBS", "CNN", "NBC","Fox News" сувгуудад хүргээд байгаа аж. Тус шаардлагад "... Жулианид эфирт гарч Трампын талд нийцсэн илэрхий хуурамч, ор үндэсгүй гэдэг нь батлагдсан хуйвалдааны онол тарааж байна. Ийм мэдэгдэл тараалгахаар Жулианид эфирийн үнэ цэнтэй цагийг хүргэх нь үзэгчдийн нийт ашиг сонирхолд нийцэхгүй төдийгүй, сэтгүүл зүйд ашиг өгөхгүй" гэж мэдэгдсэн байжээ.
Трампын өмгөөлөгч Жулиани нь сүүлийн хэдэн өдрүүдэд Америкийн гол сувгуудаар гарч янз бүрийн мэдэгдэл хийсэн. Тухайлбал, Байден ба түүний хүүгийн зүгээс Украйнд хууль бус үйл ажиллагаа явуулсан тухай нотлох баримт байгаа гэсэн. Мөн 2016 оны үед Украйны албаны хүмүүс Америкийн Ерөнхийлөгчийн сонгуульд хөндлөнгөөс оролцон нөлөөлөхийг оролдож байсан гэх мэдээлэл байгаа тухай мэдээлж байсан юм.
Одоогоор Конгресс дахь Ардчилсан намын олонх Жулианигаас мэдүүлэг авахаар дуудуулаад байгаагаа албан ёсоор мэдэгджээ.
Сэтгэгдэл (0)
Сэтгэгдэл бичигдээгүй байна