Энэ оны нэгдүгээр сарын 22-ны өдөр Дорноговь аймгийн Зүүнбаян дахь Зэвсэгт хүчний 336 дугаар ангийн алба хаагч амиа алдсан харамсалтай хэрэг гарсан. Тэгвэл найман сарын дараа уг хэрэгт холбогдох шүүх хурал болох гэж байна. Тодруулбал, талийгаач Б.Алтантулгын амиа алдсан хэргийн шүүх хурал өнөөдөр 12.00 цагаас Говьсумбэр дэх Эрүүгийн хэргийн анхан шатны шүүхэд болно.
Талийгаач Б.Алтантулга нь 19 настайдаа Эрдэнэт хотоос тус цэргийн ангид татагдсан. Амиа алдах үедээ биедээ ил харагдах олон шарх сорвитой байсан нь хэвлэл мэдээллийн хэрэгслээр ил болсон юм.
Түүний амиа алдсан хэрэгт холбогдуулан тус цэргийн ангийн гурван алба хаагчийг шалган, яллах дүгнэлт үйлдэн шүүхт ирүүлээд байгаа юм. Тодруулбал, тус ангийн Мото буудлагын батлионы танкын ротын захирагч н.Энхбаяр, танкын ротын нэгдүгээр салааны механик, жолооч н.Бандалхангай, салаан захирагч н.Бадамсамбуу нар юм. Тэд 24-31 насны залуус юм байна. Бид шүүх хурлын талаарх мэдээллийг цаг алдалгүй хүргэх болно.
Манай сурвалжлах баг хэрэг гарах үед талийгаачийн ар гэрээс бэлдсэн сурвалжлагыг мөн хүргэж байна.
Сэтгэгдэл (0)
Сэтгэгдэл бичигдээгүй байна