Өмнөд Судан ба БНХАУ нь газрын тосны салбар дахь хамтын ажиллагаагаа бэхжүүлэхээр болж байгаа тухай "Синьхуа" агентлаг мэдээлсэн байна. БНХАУ-аас Өмнөд Судан улсад суугаа Элчин сайд Хуа Нин нь Өмнөд Суданы Газрын тосны сайд АвовДаниэльтэй хэлэлцээ хийж газрын тос олборлох салбарт хөрөнгө оруулалт хийх боломжийн талаар ярилцсан байна. Өмнөд Суданы Газрын тосны орлогч сайд МайенВоль нь тус улсын "SSBC" радиод ярилцлага өгөхдөө "Бид газрын тос олборлуулахын тулд Хятадын компаниудтай найзлах гэж байгаа, газрын тос бүгдэд нь ашигтай" гэж мэдэгджээ.
Африк тивийн Сахарын цөлөөс өмнө зүгт байрладаг орнуудын дотор Өмнөд Судан нь газрын тосны нөөцөөрөө гуравдугаарт ордог. 2013 оны иргэний дайн нь газын тосны олборлолтын хэмжээг хоногийн 350 мянган баррель байсныг нь 130 мянган баррель хүртэл бууруулсан байдаг. Харин 2018 оны есдүгээр сард талууд энхийн гэрээнд гарын үсэг зурсны дараа газрын тосны орд газрууд дээрх олборлолтыг дахин сэргээсэн бөгөөд энэ оны сүүл гэхэд олборлолтын хэмжээг 200 мянган баррель хүргэх тооцоотой байгаа юм байна.
Сэтгэгдэл (0)
Сэтгэгдэл бичигдээгүй байна