Энэ сарын 14-ны шөнийн 23.00 цагийн үед Чингис хаан нисэх онгоцны буудалд Хүннү эйр компанийн онгоцыг хучиж байсан тус компанийн техникийн ажилтан, 23 настай н.Мэргэншагай онгоцны далавчнаас унасан осол гарсан. Ослын улмаас хохирогч ухаангүй ГССҮТ-д хүргэгдэн, улмаар тархиндаа хагалгаа хийлгэсэн талаар ар гэрийнхэн нь мэдээлсэн юм.
Эмчийн үзлэгээр тархиндаа цуурал, бяцрал гэсэн оноштой түүнд хоёр хагалгаа хийсэн бөгөөд биеийн байдал хүнд, ухаангүй Сэхээн амьдруулах тасагт эмчлүүлж байгаа юм.
Осол болох үед Хүннү эйр ХХК-ийн гурван ажилтан ажиллаж байсан бөгөөд н.Мэргэншагайг өндрөөс унасны дараа хамт ажиллаж байсан ажилтан компанийнхаа хяналтын ажилтан руу станцаар мэдэгдэн, хохиргчийг зөөн буудлын эмчид хүргэж өгсөн байна. Энэ дагуу эмч үзлэг хийгээд ГССҮТ рүү хүргүүлжээ. Харин тухайн үед цагдаагийн байгууллагад дуудлага өгөөгүйн улмаас ослын газарт үзлэг хийгдээгүй байна. Үүнд ар гэрийнхэн гомдолтой байгаа бөгөөд хэргийг нуун далдлахаар компанийн удирдлагууд оролдож байна гэж хардаж байгаагаа хохирогчийн ах Д.Совд хэлсэн юм. Д.Совд нь ИНЕГ-т техникийн хэлтсийн даргаар ажиллаж байсан бөгөөд дүүгээ нисэх салбарт суралцаж, ажиллахыг ятган энэ мэргэжлийг эзэмшүүлснээ хэлж байлаа.
Осол гарсны дараа буюу 01.30 цагийн үед н.Мэргэншагайгийн ар гэрт мэдэгдсэнээр Хөвсгөл аймгаас ээж, ах дүү нар нь ирсэн байна. Хохирогчийн ээжийн хувьд ч "Осол болонгуут эмнэлгийн болоод цагдаагийн байгууллагад яаралтай дуудлага мэдээлэл өгөөгүй. Тархиндаа бэртэлтэй хүнийг хөдөлгөж зөөвөрлөсөн нь тархинд цус харвах шалтгаан болсон байж болзошгүй" гэсэн юм.
Мөн эмнэлэг дээр Хүннү эйр ХХК-ийн Нислэгийн аюулгүй байдал хариуцсан захирал н.Батпүрэв ирсэн бөгөөд тэрбээр "н.Мэргэншагай онгоцны далавчнаас унасан гэсэн мэдээллийг хамт ажиллаж байсан ажилтан өгч байна. Бид хөдөлмөрийн аюулгүй байдлын заавар зааварчилгааг хуулийн хүрээнд өгч ажилладаг. Осол гарсан даруйд ажилтныхаа эрүүл мэндэд анхаараад цагдаад дуудлага өгч амжаагүй байна. Бид зугтчихгүй болохоор цагдаад мэдээлэл өгөхөд оройтохгүй. Ажилтныхаа эрүүл мэндийг сайжруулах нь нэн чухал байна" гэсэн тайлбарыг өгсөн юм.
Сэтгэгдэл (0)
Сэтгэгдэл бичигдээгүй байна