БАГА НАСНЫ СУРАГЧДЫГ АСРАН ХАМГААЛАГЧГҮЙГЭЭР СУРГУУЛИАС ГАРГАХГҮЙ БАЙХЫГ АНХААРУУЛЖ БАЙНА

"Нэгдүгээр ангийн сурагч охин маань алга болчихлоо" гэсэн дуудлага цагдаагийн байгууллагад иржээ. Тодруулбал, зургаан настай сурагч охин Н хичээлээ тараад ээж, эмээтэйгээ өөрийнхөө утсаар холбогдож, "Ангийнхаа хүүхдийн гэрт байна. Ирж аваарай" гээд утас нь холбогдох боломжгүй болжээ.

Охины ар гэрийнхэн охиныхоо байгаа хаягийг мэдэхгүй тул цагдаагийн байгууллагад хандсан байна. Энэ дагуу цагдаагийн алба хаагчид ажиллаж, охиныг олж, ар гэрийнхэнд нь хүлээлгэн өгчээ. Харин нийгмийн сүлжээнд "Хүүхэд алга болсон байхад цагдаагийн алба хаагчид ажиллахгүй байна" гэх утга бүхий мэдээлэл цацагдсан байна.

Иймд цагдаагийн байгууллагаас эцэг, эхчүүд, багш нарт сэрэмжлүүлэг болгон, "Хүүхдийнхээ хичээлийн цаг дуусахад хоцролгүйгээр өөрийн биеэр авдаг байх, хүүхдийг асран хамгаалагчгүй сургуулиас гаргахгүй байх, хүүхдүүддээ өөрсдийн утасны дугаараа цээжлүүлэх"-ийг сэрэмжлүүлж байна.