АНУ нь Украйны "Мотор Сич" компанийг худалдан авах хэлэлцээг тус компанийн удирдлагатай хийж эхэлсэн тухай "The Wall Street Journal" мэдээлж байна. Хэлэлцээнд Америкийн талыг "Blackwater" хувийн хамгаалалтын компанийн үндэслэгч Эрик Принс төлөөлж байгаа юм байна. Хэлэлцээг Ерөнхийлөгч Трампын захиргааны даалгавраар явуулж байгаа бөгөөд гол зорилго энэхүү компанийг Хятадын компанид худалдагдахаас өрсөх явдал гэжээ.
"Мотор Сич" нь байлдааны онгоцны тийрэлтэт хөдөлгүүр, нисдэг тэрэгний хөдөлгүүр, байлдааны усан онгоцны хөдөлгүүр хийдэг томоохон компани юм. 2014 оны Майдан хувьсгалаас өмнө тус компанийн хөдөлгүүрүүдийн дийлэнхийг хөрш ОХУ худалдан авдаг байсан. Харин Украйнд төр эргэж хоёр орны харилцаа муудахад Украйны эрх баригчид Орос руу байлдааны болон давхар зориулалттай бүх бүтээгдэхүүн экспортлохыг хориглосон юм. Үүний дараагаар "Мотор Сич" нь санхүүгийн тун хүнд байдалд орсон. Энэ байдлыг нь соргогоор анзаарсан Хятадын хөрөнгө оруулагчид хөрөнгийн бирж дээрх компанийн хувьцааны 51 хувийг худалдан авч, цаашид үйлдвэрийг өргөжүүлэхэд хөрөнгө оруулалт хийхэд бэлэн тухайгаа мэдэгдсэн юм. Одоо энэ саналыг нь Украйны удирдлага зөвшөөрөх ёстой. Харин энэ байдал АНУ-ын удирдлагад огтхон ч таалагдахгүй байгаа юм.
Хятад нь Украйны компанийн авснаар байлдааны нисэх онгоц, нисдэг тэрэг, усан онгоцны орчин үеийн хөдөлгүүр үйлдвэрлэх тал дээр Америкаас хоцрогдож байгаагаа богино хугацаанд нөхөж, яваандаа Америкт улам их аюул учруулах болно гэж үзэж байгаа юм байна. Ийнхүү "Мотор Сич" нь Америкийн үндэсний аюулгүй байдлын хувьд стратегийн чухал ач холбогдолтой объект болж хувирсан. Иймд есдүгээр сард АНУ-ын Батлан хамгаалахын сайдын Украйны батлан хамгаалах үйлдвэрлэл хариуцсан ахлах зөвлөх Дональд Винтер, Киев дэх АНУ-ын элчин сайдын яамны итгэмжлэгдсэн төлөөлөгч Билл Тейлор гэх мэт өндөр албан тушаалтнууд "Мотор Сич" компанийн ажиллагаатай биечлэн танилцаж байжээ. Наймдугаар сард Трампын аюулгүй байдлын зөвлөн асан Жон Болтон Украйнаар айлчлах үедээ үйлдвэртэй танилцан, хэрхэвч Хятадад өгч болохгүй гэж мэдэгдэж байсан юм.
Украйны шинэ эрх баригчид "Мотор Сич"-ийн хөдөлгүүрийг Орос руу нийлүүлэхийг хориглосны дараагаар ОХУ –ын зэвсэгт хүчин зарим төрлийн нисдэг тэрэг, байлдааны усан онгоцоо төлөвлөгөөний дагуу зэвсэглэлдээ авч чадахаа байж, аргагүйн эрхэнд өөрсдөө ийм төрлийн моторыг шинээр зохион бүтээж, нэлээд цаг алдаж байсан тухай мэдээ байдаг.
Сэтгэгдэл (0)
Сэтгэгдэл бичигдээгүй байна