Сингапурт метроны станц дээр эмэгтэйчүүдийн банзал доогуур сэм шагайдаг гаж донтон бусад зорчигчдод зодуулж амиа алдсан тухай "South China Morning Post" сонин мэдээлсэн байна. Далд камераар эмэгтэйчүүдийн зургийг сэм авч байсан этгээдийг бусад зорчигчид анзаарч дургүйцлээ илэрхийлэн цагдаа дуудсан байна. Үүний дараа гаж донтон этгээд зугтаахад таван хүн араас нь хөөжээ. Тэд гаж донтныг метроны буудлаас 500 метрийн зайнд гүйцэн унагаж, саатуулах арга хэмжээ авсан аж. Цагдаа нарыг хэргийн газар ирэхэд гаж донтон этгээд хөдлөхөө больж, судасны цохилт нь мэдрэгдэхгүй болсон байжээ. Иймд цагдаа нар түргэн тусламж ирэх хүртэл түүнд хиймэл амьсгал, зүрхний иллэг хийсэн ч амжилтад хүрээгүй аж. Түргэн тусламжийн эмч нар ирээд гаж донтон этгээд хэдийн амьсгал хураасныг тогтоосон байна. Сэжигтнийг хөөхөд оролцсон гэрч "Гүйцэж очоод хэрэгтнийг газар унагасан. Гэтэл бөөлжиж эхэлсэн тул хамаагүй шахахаа больсон. Би түүнийг огт боогоогүй. Бид зүгээр л иргэнийхээ үүргийг гүйцэтгэж байсан, бүгд л цагдаа иртэл тэр хүнийг саатуулахыг л хүссэн" гэж мэдүүлсэн байна.
Сэтгэгдэл (0)
Сэтгэгдэл бичигдээгүй байна