​НИСЭЖ БАЙГАА ОНГОЦНЫ ЖОЛООНЫ АРД ЦАРАЙЛАГ ЭМЭГТЭЙГ СУУЛГАСАН БАГИЙН ДАРГЫН НИСЭХ ЭРХИЙГ БҮХ НАСААР НЬ ХАЛНА

Зорчигч тээврийн нисэх онгоцыг нислэг үйлдэж явахад нь багийн бүхээгт орж, жолооны ард суусан эмэгтэйн зураг Хятадын интернэтээр хурдацтай тархаж ихээхэн дуулиан тариад байна. Олон арван хүний амь насыг хариуцаж яваа нисэх багийн дарга үүрэг, хариуцлагадаа ийм хөнгөмсөг хандаж, зорчигчдын амь насыг эрсдэлд оруулсныг интернэт хэрэглэгчид эрс шүүмжилжээ. Улмаар нэгэн интернэт хэрэглэгч зургийг авсан онгоцны эзэн "Air Guilin" компанид гомдол мэдүүлсний дараа компанийн удирдлага шалгалт явуулжээ. Ингэснээр арваннэгдүгээр сарын 4-нд Гуйлинаас Янжоу орж байсан GT1011 рейсийн нислэгийн үеэр нисэх багийн дарга дүрмийг зөрчин хөндлөнгийн хүнийг нисгэгчдийн бүхээгт орохыг зөвшөөрсөн төдийгүй жолооны ард суулгасан болохыг тогтоосон аж. Улмаар мөрдөн байцаалтын дүнгээр багийн даргын нисэх эрхийг бүх насаар нь хасахаар болсон байна. Зураг дээрх эмэгтэй нь Гуйлуны аялал жуулчлалын сургуулийн онгоцны үйлчлэгчийн ангийн оюутан болохыг тогтоосон тул сургууль дээр нь шалгалтын ажил хийгдэж байгаа аж. 9/11 алан хядах ажиллагааны дараа дэлхий даяар нислэгийн аюулгүй байдлыг хангах түүн дотор, нисгэгчийн бүхээгт гаднын хүн нэвтрэхээс хамгаалахад онцгой анхаарал хандуулах болж, янз бүрийн заавар, дүрэм журам олныг баталсан ч энэ удаад үйлчлээгүй бололтой.

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top