Польшийн эмнэлгүүдийн 80 хувь нь эмч нарын дутагдалд ороод байгаа боловсон хүчнээ нөхөхийн тулд гадаадаас, тэр дундаа хил залгаа Украйнаас эмч нар ажилд авахад бэлэн байгаа тухай дэлхий даяар үйл ажиллагаа явуулдаг хүний нөөцийн "ManpowerGroup" агентлаг мэдээлсэн байна. Дутагдаж байгаа эмч нарын тоог "Польшийн радио" нь 50-аас 70 мянган гэж багцаалдсан байна. Иймд Польшийн эмнэлгийн дээд танхим нь Польшид ажиллах хүсэлтэй гадаадын эмнэлгийн ажилтнуудаас польш хэлний шалгалт авч, ажиллах эрхийг олгодог болсон. Ийм замаар 2016-2018 онуудад Украйны 262 иргэн, Беларусын 81, Саудын Арави, Германы, АНУ-ын 9 иргэн шалгалт өгөн тэнцэж, Польшийн эмнэлгүүдэд ажиллаж байгаа аж. Үүнтэй холбоотойгоор Польшийн эмнэлгийн дээд танхимын Рафал Холубицкий нь "Украйн бол манай өрсөлдөгч биш харин дэмжлэгийн бүлгийнхэн. Гэхдээ тэдний дадал чадварыг Польшид ч бас бататган шалгахыг бид хүсэж байна" гэжээ. Польш эмч нар нь илүү өндөр цалинтай Их Британи, Герман, Швейцар зэрэг улсууд руу очиж ажилладаг тул боловсон хүчний ийм их хомсдол үссэн аж. Иймд мэргэжлийн чадвараа баталгаажуулж чадсан, польш хэл судалсан гадаадын иргэн энэ улсад ажиллахад таатай орчин бүрэлджээ.
Сэтгэгдэл (0)
Сэтгэгдэл бичигдээгүй байна