Их Британид амьдардаг 56 настай Гейл Сэй гэгч эмэгтэй сугалааны гурван тасалбар худалдан аваад бөглөхдөө хоёрыг нь яг адил тоонуудаар бөглөсөн байж. Тасалбараа явуулахдаа алдаа гаргаснаа харсан ч азад итгээгүй болохоор тэр чигээр нь явуулж орхисон гэж "Daily Star" тодруулж байна. Гэтэл дараа нь сугалааны тохирлыг утсаараа шалгатал алдаж бичсэний ачаар авах шагналын хэмжээг хоёр дахин нэмэгдүүлсэн гэдгээ мэдээд маш их баярласан гэнэ. Гейл нь 4, 7, 20, 23, 27, 8 гэсэн тоонуудыг андуурч хоёр тасалбар дээр давтан бичсэн тул сугалааны дээд шагнал болох 500 мянган фунтыг хоёр удаа хожсон хэрэг байжээ. Ингээд зогссонгүй Гейлийн бичсэн энэ тоонууд өөр мөрөн дэх ахин гурван тоотой давхацсан тул 20 фунт, таван тоо давхацсаны 5000 фунт, өөр мөрний гурван тоог таасны 10 фунтыг давхар хожсон байна. Гэйл өөрөө цэвэрлэгч хийдэг, нөхөр Филипп нь 65 настай, тэтгэвэрт гарахаасаа өмнө барилга дээр ажиллаж байсан тийм ч хангалуун бус амьдралтай байжээ. Ихээхэн хэмжээний мөнгө хожсондоо баярлан хөл нь гуйвж унах гээд байсан, тэгээд Фрэнк Синатрагийн "Who wants to be a millionaire" дууг дуулан гэртээ бүжиглэж эхэлсэн гэж тэрээр сэтгүүлчдэд ярьсан байна. Гэйл Филипп хоёр нь насанд хүрсэн дөрвөн хүүхэдтэй, долоон ачтай юм байна. Одоо тэд хүүхдүүддээ шинэ байр авахад нь туслахаар шийдсэн бөгөөд Гэйл цэвэрлэгчийн ажлаасаа гарсан байна. Энэ хоёр долоо хоног болгон сугалааны гурван тасалбар худалдан аваад хайртай хүмүүсийнхээ төрсөн өдөр, дурсгалт үйл явдлын огнооны тоог бичдэг байсан нь ийнхүү аз авчирчээ.
Сэтгэгдэл (0)
Сэтгэгдэл бичигдээгүй байна