Германы цагдаа нар Оффенбах хотод алан хядах ажиллагаа явуулахаар зэхэж байсан "Лалын улс" алан хядах бүлэглэлийн гишүүн гурван хүнийг баривчилсан тухай Майн дахь Франкфурт хотын прокурорын албанаас мэдээлжээ. Баривчлагдсан хүмүүс нь 21-ээс 24 насны залуучууд бөгөөд тэсрэх бодис, галт зэвсэг ашиглан алан хядах ажиллагаа явуулахаар төлөвлөж байжээ. Гол сэжигтэн нь македон гаралтай Германы иргэн бөгөөд тэсрэх бодис хийхэд шаардлагатай химийн бодис худалдан авахаас гадна галт зэвсэг авах гэж байгаад амжаагүй байна. Бусад хоёр нь Туркийн иргэд байжээ.
Баривчлагдсан этгээдүүд хүмүүстэй ярилцахдаа өөрсдийгөө "Лалын улс" бүлэглэлийн хүмүүс гэж удаа дараалан мэдэгдэж байсныг урьдчилсан мөрдөн байцаалтын явцад тогтоосон гэж байна. Тэдний гэрт нэгжлэг хийх явцад тэсрэх бодис хийхэд хэрэглэдэг бодис, янз бүрийн тоног хэрэгсэл, хэвлэмэл болон электрон өгөгдөл хадгалагч дээр бичсэн их хэмжээний чухал нотлох баримт илрүүлсэн аж.
Баривчлах ажиллагаанд цагдаагийн 170 албан хаагч оролцжээ.
Турк улс нь өөрийн нутаг дээрх "Лалын улс" бүлэглэлтэй холбоотой гэж сэжиглэгдэн баривчлагдсан хүмүүсийг иргэн харьяаллынх нь дагуу албадан нутаг буцааж байхаар болсны дараа Герман зэрэг Европын холбооны орнууд алан хядагчдын дайралтад өртөж магадгүй гэсэн болгоомжлол эрс нэмэгдээд байгаа юм.
Сэтгэгдэл (0)
Сэтгэгдэл бичигдээгүй байна