Туркийн Ерөнхийлөгч Эрдоган Америкийн ЕрөнхийлөгчтТрамптай хэлэлцээ хийсний дараагаар Оросыг С-400 зенитийн пуужингийн системээс татгалзахгүй гэж мэдэгдсэн тухай Туркийн "Anadolu" агентлаг мэдээлсэн байна. Эрдоган нь Америкийн "Patriot" системийг худалдан авч болох ч хариуд нь Оросын С-400-аас татгалзахгүй гэжээ. Оросын системээс татгалз гэсэн Америкийн шаардлагыг Эрдоган "Туркийн хараат бус байдалд халдсан хэрэг" гэж нэрлэжээ. Мөн Америкийн Ерөнхийлөгчийн ойрын хүрээлэл дэх зарим улстөрч Турктэй харилцаагаа таслахыг хичээж байгаад ч Туркийн Засгийн газар америкчуудтай ч тэр, оросуудтай ч тэр харилцан ярилцах бодолтой байгаа гэжээ. Трамп нь Туркийн Ерөнхийлөгчтэй уулзахын өмнө захидал бичиж 100 тэрбум долларын худалдааны гэрээ санал болгоод хариуд нь Оросын С-400-аас татгалзах, Сирид явуулж байгаа бодлогоо өөрчлөх гэсэн болзол тавьсан юм байна. Турк нь 2,5 тэрбум доллароор ОХУ-аас С-400 зенитийн пуужингийн систем худалдан авсан юм. Харин АНУ ба НАТО нь оросуудын систем нь туркчуудын хүлээн авах ёстой "F-35 Lightning II" тав дахь үеийн америк сөнөөгч онгоцны тухай нууц мэдээллийг Москва руу дамжуулдаг байж магадгүй гэж сэрдэж байгаа. Үүнээс болоод "F-35" сөнөөгч онгоцны төсөл дээр хамтран ажилласан Туркт, тохиролцоо ёсоор 100 ширхгийг нийлүүлэхээс татгалзсан төдийгүй орос зэвсэг худалдан авлаа гэж янз бүрийн хориг арга хэмжээ авахаар зэхээд байгаа юм.
Сэтгэгдэл (0)
Сэтгэгдэл бичигдээгүй байна