АНУ-ын өрхийн өр энэ оны гуравдугаар улиралд өнгөрсөн оны мөн үеийнхээс 3,3 хувиар өсөж 13,95 их наяд долларт хүрсэн тухай Нью-Йоркийн Холбооны нөөцийн банк мэдээлсэн байна. Мөн гуравдугаар улиралд хугацаа хэтэрсэн зээлийн өр хоёрдугаар улирлынхаас 0,4 хувиар өсөж 4,8 хувь болсон аж. Ингэснээр АНУ-ын өрхийн өр 21 улирал дараалан өссөөр дээд амжилт тогтоогоод байгаа юм байна. Үүний өмнө буюу 2008 оны гуравдугаар улиралд өрхийн өр 12,68 их наяд долларт хүрч дээд амжилт тогтоогоод байсан аж.
Америкийн өрхүүдийн авсан зээлийн дотор хамгийн буюу 67,7 хувийг нь ипотекийн зээл эзэлж байгаа бөгөөд энэ зээлийн хэмжээ 31 тэрбумаар нэмэгдэн 9,44 их наяд доллар болсон байна. Хоёрдугаарт нь, боловсролын зээл орсон бөгөөд нийт зээлийн 10,8 хувийг эзэлж 1,5 их наяд доллар болсон. Гуравдугаарт, авто машины зээл орсон бөгөөд нийт зээлийн 9,5 хувийг эзэлж 1,32 их наяд доллар болжээ. Дөрөвдүгээрт нь зээлийн картын өр орсон байна. Энэ өрийн хэмжээ 880 тэрбум доллар болсон.
Америкийн өрхүүд зээлийн хүү багасаж байгааг ашиглан зээл идэвхтэй авах болсныг энэ бүх үзүүлэлт харуулж байна гэж мэргэжилтнүүд үзжээ. 2019 оны гуравдугаар сард Америкийн өрхүүдийн авто машины зээлийн хэмжээг дээд амжилт тогтоосон бол ипотекийн зээл өмнөх жилийнхээс мэдэгдэхүйц өссөн аж.
Сэтгэгдэл (0)
Сэтгэгдэл бичигдээгүй байна