​Д.Одбаярыг хэний зөвшөөрлөөр, ямар хуулийн дагуу зугтаалгав

Үндсэн хуулийн цэцийн дарга Д.Одбаяр онгоцны хоолойгоос шууд автомашиндаа суусан талаар бид мэдээлсэн. Тэрбээр онгоц ирэхээс өмнө өөрийн автомашинаа нисэх буудлын талбай руу оруулж онгоцны хоолойгоос шууд автомашиндаа хэвлэлийнхэнээс зугтаж суусан гэсэн үг юм. Тэгэхээр Д.Одбаяр нь энгийн иргэн адил хил, гаалийн бүсээр нэвтрэлгүй, шууд нисэхийн талбайгаас автомашинаараа гарсан гэсэн үг юм.

Зариг.мн сайтын сурвалжлах баг автомашин нэвтэрдэг хаалгаар хэн нэгэн төрийн өндөр албан тушаалтны автомашин нэвтэрсэн эсэхийг тэндэхийн ажилтнуудаас асуухад огт тийм мэдээлэл ирээгүй ээ гэж тайлбарласан. Иргэний нисэхийн ерөнхий газрынхан ҮХЦ-ийн даргатай хуйвалдаж "хэвлэлийнхэн"-ээс зугтах тусгай ажиллагааг зохион байгуулсан байх магадлалтай.

Энэ талаар Иргэний нисэхийн ерөнхий газрын дарга Л.Бямбасүрэнтэй холбогдож дараах зүйлийг тодрууллаа.

-ҮХЦ-ийн дарга Д.Одбаяр онгоцноос шууд автомашиндаа суусан байна. Нисэхийн талбайруу ямар зөвшөөрлөөр автомашин нэвтэрч, хил гаалиар хянуулалгүй шууд гардаг вэ?

-Надад энэ талаар мэдээлэл огт алга. Хэрвээ тэгж суусан бол Хил хамгаалах ерөнхий газар, Гаалийн ерөнхий газар зэрэг төрийн олон байгууллагын хяналт дор явагддаг. гэсэн хариултыг өглөө.

Бид ГЕГ болоод Хил хамгаалах ерөнхий газраас мэдээллийг тодруулж хүргэх болно. Бүгд найрамдах намын дарга Б.Жаргалсайхан хэлэхдээ Д.Одбаярыг цэцэг тэвэрч угтаад ажлыг нь хийлгэх ёстой гэж мэдэгдсэн бол Монголын төрийн байгууллагууд түүний замыг нь засч хэвлэлийнхэнээс амжилттай зугтаалгаж чадлаа. Энэ үйлдэл хууль, журмын дагуу байсан эсэхийг үргэлжлүүлж сурвалжилна.