Сүүлийн үед АНУ, НАТО-ийн гишүүн орнууд ОХУ-тай хил залгадаг Балтын тэнгис орчмын Латви, Литва, Эстони гэсэн гурван орны зэвсэгт хүчнийг байлдах чадварыг сайжруулах болон эдгээр орнуудад өөрийн цэргийн ангиудаа байнгын үндсэн дээр байршуулахад онцгой анхаарах болсон. Өрнөдийн мэдээллийн хэрэгслүүдээр гурван улсаас болж АНУ ба НАТО нь ОХУ-тай дайтаж, ялалт байгуулан Калининград мужийг нь эзлэн авч байгаа талаарх янз бүрийн судалгаа, таамаг олон гарах болсон.
Хамгийн сүүлд гэхэд АНУ нь ОХУ-ын хилийн ойролцоо RQ-4 Global Hawk стратегийн тагнуулын дрон хоёр ширхгийг, мөн радио электрон тагнуулын онгоц хөөргөн тагнан бүртгэх нислэг хийсэн тухай "Plane Radar" нь "Twitter" хуудсаараа мэдээлсэн байна.
АНУ-ын Цэргийн нисэх хүчний мэдлийн RQ-4B-4 Global Hawk дронууд нь Итали дах Сигонелла нисэхийн баазаас хөөрч Литва, Латви, Эстонийн нутаг дээгүүр оросын Калининград, Лениград, Псков мужуудын хилийн харалдаа нислэг үйлдсэн. Үүнтэй зэрэгцээд радио электрон тэмцэл хийх зориулалт бүхий Boeing RC-135V Rivet Join онгоц Британи дахь Милденхолл нисэх баазаас хөөрч Калининград мужийн хилийн харалдаа тагнуулын нислэг үйлджээ.
RQ-4 Global Hawk стратегийн тагнуулын дрон нь 19,8 мянган метрийн өндөрт, 24,9 мянган км замыг цагт 800 км хурдтайгаар туулан нисэх чадвартай. Дотроо маш өндөр мэдрэмжтэй радио электрон тагнуул, бүртгэл, тэмцлийн тоног төхөөрөмж тээх чадвартай бөгөөд тасралтгүй 36 цаг нисэх чадвартай аж.
Сэтгэгдэл (0)
Сэтгэгдэл бичигдээгүй байна