Африкийн гахайн тахал туссан хэдэн зуун мянган гахайг хоёр Солонгосын хилийн орчим устгалд оруулсан ч, бүс нутагт орсон ширүүн борооны улмаас амьтадыг булсан газар үерт автагдан, нутгийн гол мөрнүүдийн өнгө үхсэн амьтадын цусанд будагдсан улаан болсон тухай "https://meatinfo.ru" сайт мэдээлж байна.
Гэвч орон нутгийн эрх баригчид гахайнуудыг устгалд оруулахаас өмнө халдваргүйжүүлсэн тул шороонд шингэсэн цусаар нь дамжин өвчин халдварлана гэж айх ямар ч үндэслэл байхгүй гэж мэдэгдсэн байна.
Африкийн гахай тахал өвчин Хойд Солонгост анх 2019 оны тавдугаар сард бүртгэгдсэн. Үүний дараагаар Өмнөд Солонгосын эрх баригчид аюулт өвчнийг хилийн дээс алхуулахгүй урьдчилан сэргийлэх янз бүрийн арга хэмжээ авсан хэдий ч 2019 оны есдүгээр сард Африкийн гахайн тахал Өмнөд Солонгост бас бүртгэгджээ. Үүний дараа хилийн хоёр талд гахайн талах удаа дараалан бүртгэгдэж явсаар Өмнөдийн тал нь цаашид өвчний тархалтыг зогсоох зорилгоор хилийн бүс нутагт 380 мянган толгой гахайг устгалд оруулсан юм байна.
Устгалд оруулсан гахайнуудыг тусгайлан хуванцраар доторлосон нүхэнд булах замаар үхдэлийн шингэн хөрсөөр дамжин алдагдахаас сэргийлсэн юм байна. Хамгийн сүүлд хоёр Солонгосыг заагладаг хилийн зурвасаас холгүйхэн 47 мянган толгой гахайг устгасан аж. Гэвч энэ удаад нөөц бололцоо хүрэлцээгүйгээс устгалд орсон биологийн аюултай хэдэн арван мянган гахайн сэгийг цаг тухайд нь булж чадалгүй хэсэг байлгасан юм байна. Яг энэ үер орсон ширүүний борооны дараа энэ олон мянган сэг зэмээс урссан шингэн ойролцоох гол, мөрнүүдийн өнгийг өөрчилсөн нь тэр аж.
Үүнээс болоод өвчний вирус гол усанд орж, цаашлаад ундны усны сангуудад орсон байж болзошгүй гэсэн болгоомжлол газар авсан гэж байна. Гэвч Сөүлийн Хүрээлэн буй орчны яам нь тусгай шахуурга ашиглан гол мөрнийг цуснаас цэвэрлэсэн тул урсгалын доогуур байгаа бүс нутагт ямар ч аюулгүй гэж мэдэгдсэн гэж байна.
Сэтгэгдэл (0)
Сэтгэгдэл бичигдээгүй байна