Тав дахь үеийн сөнөөгч бөмбөгдөгч F-35-ын одоо үйлдвэрлэгдэж байгаа гурван хувилбараас нэг нь ч АНУ-ын Батлан хамгаалах яамнаас тавигддаг найдвартай байдал ба засвар үйлчилгээ хийх хүртээмжтэй байдлын үндсэн таван шаардлагад нийцэхгүй байгаа юм байна. Энэ тухай АНУ-ын Батлан хамгаалах яамны Шуурхай туршилтын захирал РобетБехлер албан ёсоор мэдэгджээ. Бехлер нь "F-35-ын бүх хувилбаруудын ашиглалтын хүртээмжтэй байдал нь засвар үйлчилгээний хүлээлтийн түвшнээс доогуур байгаа тул эдгээр онгоцнууд илүү олон эвдэрч, засвар хийхэд илүү хугацаа шаардлагатай болж байна" гэжээ.
АНУ-ын Конгрессын Судалгааны алба "GAO"-аас энэ оны арваннэгдүгээр сард гаргасан тайланд нийт F-35 онгоцнуудын 30 хувь нь 2018 оны таваас арваннэгдүгээр саруудад сэлбэг дутагдсан шалтгаанаар хөөрөх чадваргүй газар дээр өнгөрөөсөн гэж мэдэгдсэн байжээ. Мөн 2019 оны арваннэгдүгээр сарын байдлаар агуулах ба үйлдвэрүүд дээр засвар хийх шаардлагатай 4300 ширхэг сэлбэг хуримтлагдаад байсныг онцлон заасан байна.
F-35 тав дахь үеийн сөнөөгч бөмбөгдөгч онгоц нь дэлхийн түүхэн дэх хамгийн өндөрт өртгөөр бүтээгдсэн онгоц болсон. Түүнийг бүтээн үйлдвэрлэлт шилжүүлтэл 18 жил зарцуулсан аж. Энэ хугацаанд анх 233 тэрбум доллар зарцуулахаар төлөвлөж байсан ч явцын дунд зардал нь 428 тэрбум доллар болж өсжээ. Зэвсэглэлд хүлээн авах нийтF-35-ын засвар үйлчилгээнд 1,2 их наяд доллар зарцуулна гэж тооцоолсон аж. Энэ бол 2015 онд АНУ-ын Конгрессын Судалгааны албанаас тооцоолж байснаас даруй 1 их наяд доллароор илүү үнэтэй болж байгаа юм байна.
Сэтгэгдэл (0)
Сэтгэгдэл бичигдээгүй байна