АНУ-ын Сенат "Хонконг дахь хүний эрх ба ардчилалын тухай" хуулийг баталсны дараагаар БНХАУ-ын Гадаад харилцааны орлогч сайд МаЧжаосюй нь Бээжин дэх АНУ-ын Элчин сайдын хэргийг түр хамаарагч УильямКляйныг дуудан уулзаж, Сенатаас баталсан баримт нь хоёр орны харилцаанд сөрөг үр дагавар үзүүлж магадгүй тухай анхааруулсан гэдгийг "Синьхуа" агентлаг мэдээлсэн байна.
МаЧжаосюй нь "Бид АНУ-ыг тухайн хуулийн төслийн хүчин төгөлдөр болгохгүй байхад чиглэсэн арга хэмжээг нэн даруй авч, Сянганы хэрэгт хөндлөнгөөс оролцохоо зогсоохыг уриалж байна. Эс бөгөөд Хятадын зүгээс хариу болгон авах арга хэмжээнээс үүдэх бүх хариуцлагыг Америкийн тал дангаар хүлээх болно" гэж анхааруулсан байна.
Энэхүү хуулийг АНУ-ын Конгрессын хоёр танхим баталсан тул одоо Ерөнхийлөгч гарын үсэг зурж баталгаажуулснаар хүчин төгөлдөр болох юм. Шинэ хуулийн дагуу АНУ-ын Ерөнхийлөгчийн захиргаа нь жил бүр Хонконгтой байгуулсан худалдааны харилцаандаа шалгалт хийж, тус хотыг Бээжингээс хэр хараат бус, бие даасан бодлого явуулж байгаа үнэлж дүгнэж байх ёстой болно. Хэрэв Цагаан ордон Хонконгийн бие даасан байдал нь шаардлагатай биш гэж үзвэл одоо эх газрын Хятадын эсрэг үйлчилж байгаа худалдааны хязгаарлалтад Хонконгийг хамруулах ёстой болох аж. Ингэвэл Хонконг дахь Хятадын компаниуд нь гадаадын түншүүдтэйгээ хөнгөлөлттэй нөхцөлөөр бизнес эрхлэх боломжоо алдах юм.
Одоо энэ хуулийг мөрдөж эхлэх эсэхийг Ерөнхийлөгч Трамп шийдэх ёстой боллоо. Үүнтэй холбоотойгоор олон улсын шинжээч, мэргэжилтнүүд Трампыг гарын үсэг зурж баталсан тохиолдолд АНУ ба БНХАУ-ын хооронд худалдааны гэрээ байгуулах нь бараг боломжгүй шахуу болж хувирна гэдэг дээр санал нийлжээ. Учир нь, Бээжингийн хувьд АНУ-тай худалдааны тохиролцоонд хүрэх нь чухал ч гэлээ Хонконг ба Макао дахь хяналтаа алдахгүй байх нь илүү чухал тул худалдааны дайны дайныг зогсоох оролдлого хийхээс татгалзана гэж дүгнэсэн байна.
Сэтгэгдэл (0)
Сэтгэгдэл бичигдээгүй байна