​Энэтхэг ойрын зайн тусгалтай баллистик пуужингийн туршилт хийжээ

Хэдхэн хоногийн өмнө Пакистан улс цөмийн цэнэгт хошуу тээх чадвартай ойрын зай тусгалтай баллистик пуужин амжилттай хөөргөж туршиж байсан. Үүний хариуд Энэтхэг арваннэгдүгээр сарын 20-нд Prithvi-II ойрын зайн тусгалтай баллистик пуужин хоёрыг хөөргөн амжилттай туршсан тухай тус улсын Стратегийн хүчний удирдлагын хэвлэлийн албанаас мэдээлжээ.

350 км зайд тусах чадвартай хоёр пуужинг Энэтхэгийн зүүн нутаг дахь Орисса мужийн далайн эрэг орчмын арал дээрх хөдөлгөөнт харвах сууринаас хөөргөсөн аж. Хоёр пуужин Бенгалийн булан дээгүүр заасан чиглэлд нисэж, туршилтын байг, заагдсан хязгаарт амжилттай оносон гэж байна. Prithvi-II баллистик пуужинг 2003 онд зэвсэглэлд авсан бөгөөд цөмийн цэнэгт хошуу эсвэл 1 тонн хүртэлх масстай ердийн цэнэгт хошуу тээх чадвартай.