​Зургаан настай хүүг ангийн багш О нь байнга зодож, дарамталдаг байжээ

Зургаан настай хүү Т нь сургуульд орсон цагаасаа эхлээд уравгар, шөнө гэнэт хар дарж сэрдэг, орондоо шээдэг болжээ. Хүүгийн ээж нь эмнэлгээр дагуулж явсан ч эрүүл байна гэдэг шинжилгээний хариу гарчээ. Биеийн хувьд эрүүл байгааг үзээд сэтгэлзүйчид хандсан байна. Гэтэл Т нь сэтгэлзүйчид нууцаа хэлжээ. Учир нь ангийнх нь багш О түүнийг бүтэн жил гаруй хугацаанд дарамталж, зоддог байсан, түүнийгээ ээждээ хэлж чадахгүй нуудаг тухайгаа учирлажээ.

Хэрвээ энэ тухай ээждээ хэлвэл багш манай ээжийг бас зодно, тиймээс би ээжийгээ хамгаалаад хэлээгүй гэж сэтгэлзүйчид ярьсан байна.

2018 оны 5-р сарын 09-нд Нэгдүгээр сургуулийн 1Г-ангийн сурагч Т нь хацар нь хөхөрсөн, хамарнаас нь цус гарсан байдалтай ангийнхаа хувцас солих өрөөнд сууж байжээ. Хүү ээждээ багш намайг зодсон гэсэн байна. Хүүгийн ээж энэ тухай ангийнх нь багш О –гоос асуутал "Хүүхдийг чинь хичээл хийхгүй болохоор алгадсан шүү, бусад хүүхдүүдийг мөн адил айг гэж бодоод" хэмээн тайлбарлажээ. Багшдаа зодуулсан Т хүүгийн ээж нь нэгдүгээр сургуульд багшилдаг бөгөөд мэргэжил нэгт ажлынхаа газрын багшийн үйлдлийг хэл амгүй өнгөрөөхөөр шийдсэн байна. Гэтэл энэ үйлдэл нь нэг удаагийнх бус бүтэн жил үргэлжилсэн болохыг хүү ээждээ саяхан ярьсан байна. Тэрбээр багш дандаа намайг зоддог, тиймээс манай ангийнхан ч надад дургуй. Манай ангийн 64 хүүхдийн 62 нь намайг дээрэлхдэг шоолдог, хоёр л надтай найзалдаг гэж хүү ярьжээ. Улмаар багш нь тухайн сурагчтай хэрхэн харилцана, ангийн хүүхдүүд багшийн хандлагаар нэг нэгийгээ үнэлдэг байна. С нь хүүгээ жилийн гаруйн хугацаанд сэтгэл санааны болоод бие мах бодийн дарамттай байсныг хожимдож мэдээд сургуулийнхаа захиралд өргөдөл гаргаж ангийг нь солив.

2Г-ангийн багш О-гийн нэр дээр өөр нэгэн эцэг эхээс сургуулийн захиргаанд гомдол иржээ. Манай хүүхэд өглөө цайгаа уухгүй юм, учир нь багш завсарлуулдаггүй, ариун цэврийн өрөө ч оруулдаггүй гэжээ.

Удаан хугацаанд хүүхдээ дарамтлуулсан ээж нэгдүгээр сургуулийн бага ангийг хариуцсан нийгмийн ажилтанд гомдол гаргахад "юун сүртэй юм, бүгдээрээ л зоддог биздээ" хэмээсэн байна.

2019 оны 10-р сарын 31-нд тус сургуулийн Ёс зүйн зөрчлийг хянан шалгах ажлын хэсэг хуралдсан байна. Ажлын хэсгийн багш нар нь хэрэг явдлын талаар О багшаас тайлбар авахаар хандахад "Би ямар учиртай, хэнд дуудагдаад байна, та нарт тодруулга өгөх шаардлагагүй" хэмээн цааргалжээ.

Хүчирхийлэлд өртсөн сурагч Т-гийн ээж хүчирхийллийн эсрэг 108 дугаартай утас болоод боловсролын газруудад өргөдөл гаргасан байна.