БНХАУ-ын Гадаад хэргийн сайдын орлогч ЛэЮйчэн нь АНУ-ыг Хонконгт болж байгаа үймээн самууны "хөшигний цаадах ивээн тэтгэгч" гэж мэдэгджээ. Тэрээр "Хонконг дахь эсэргүүцлийн жагсаал үймээн нь АНУ болон Өрнөдийн бусад орнуудын оролцоотой маш ихээр холбоотой. Ийм учраас бид АНУ-ыг энэ бүхнийг "хөшигний цаанаас ивээн тэтгэж" байдаг улс гэж үзэж байгаа" гэж сэтгүүлчдэд мэдэгдсэн байна. Хятадын өндөр албан тушаалтны хийсэн энэхүү мэдэгдэлтэй зэрэгцээд Ираны парламентын гишүүн ЖомалиЖафаразе нь Америкийн улсад нь болсон эсэргүүцлийн жагсаалд хөндлөнгөөс оролцон, өдөөн турхирсан тул өнгөрсөн долоо хоногт интернетийг таслахаас өөр арга байгаагүй гэж мэдэгдсэнийг "Mehr" агентлаг уламжилсан байна. Ираны Үндэсний аюулгүй байдлын дээд зөвлөл нь Засгийн газрыг эсэргүүцэгчдийг нэгдмэл зохион байгуулалтад орж бүлэглэл үүсгэхээс урьдчилан сэргийлэхийн тулд улс даяар интернетийг түр хугацаагаар таслах шийдвэр гаргасан тухайгаа мэдээлж байсан. Ираны Засгийн газар энэ сарын 15-нд 1 литр нь 10 мянган риал байсан бензиний үнийг 15 мянган болгосныг эсэргүүцэн Ираны олон хотод хүмүүс гудамжинд гарч жагссан. Зарим хотод болсон жагсаалын үеэр цагдаа нартай мөргөлдөөн болж цөөнгүй хүн амиа алдсан байна. Жагсаал нь яваандаа Хонконгтой адил олныг хамарсан үймээний хэлбэрт орж банкны 100 гаруй салбар, 50 дэлгүүрийг дээрэмдэн тоносон хэрэг гарсан. Мөн эсэргүүцлийн арга хэмжээнд оролцогчдыг АНУ болон Европын холбооноос дэмжсэн утгатай мэдэгдлийг олон нийтийн сүлжээ ашиглан удаа дараалан хийсэн.
Сэтгэгдэл (0)
Сэтгэгдэл бичигдээгүй байна