Украйны нийгэмд прокурорын газрын ажилтнуудын талаар хамгийн таагүй, сөрөг ойлголт төсөөлөл бүрэлдээд удаж байгаа талаар тус улсын Ерөнхийлөгч Владимир Зеленский ярьсан байна. Тэрээр өнгөрсөн долоо хоногийн баасан гарагт болсон Украйны прокурорын албаны ажилтнуудын баярын арга хэмжээнд оролцон үг хэлэхдээ "Эдгээр жилүүдэд харамсалтай нь "прокурор" гэдэг үг Украйнд сөрөг, зүйд үл нийцэх доромжлолын утгатай болсон гэдгийг хүлээн зөвшөөрөх хэрэгтэй. "Прокурор" гэсэн үгийг жирийн иргэд сонсохоор хууль ёс, шударга байдлын тухай төсөөлөл үүсэхгүй харин үнэтэй машин, хувийн орд харш, усан онгоц, үнэт эдлэл санаанд нь ордог болжээ" гэсэн байна.
Үүнээс үүдээд шинээр томилогдсон Украйны Ерөнхий прокурор Руслан Рябошапка болон түүний багийн өмнө энэ байдлыг өөрчлөх стратегийн чухал зорилт бий болоод байгаа Ерөнхийлөгч Зеленский онцолжээ. Мөн тэрээр "Нэн тэргүүнд анхаарах дараагийн зүйл бол авлигын гэмт хэрэг. Авлигач болгон нэр хүндээ ба ажилладаг салбараас үл хамаараад хариуцлага хүлээх ёстой. Миний бие Украйны Ерөнхийлөгчийн хувьд энэ амаргүй тэмцэлд та нарын холбоотон байх болно. Цаашдаа прокурорууд 5, 10, 15, 20, 50 гэсэн тоо дурдагдсан өдөр тутмын дуулиант мэдээнд нэр нь гарч байгаасай, гэхдээ эдгээр тоо нь авлигын хэмжээ бус харин та нарын мэргэжлийн өндөр түвшний ажлын ачаар гэмт хэрэгтнүүд, авлигачдын авсан ялын жилүүдийн тоо байх болтугай" гэжээ.
Энэ оны есдүгээр сард Зеленский нь Украйны прокурорын албыг өөрчлөх тухай хуульд гарын үсэг зурсан. Шинэ хуулийн дагуу хийгдэх өөрчлөлт нь өмнөх Ерөнхийлөгчдийн үед хийгдэж байснаас эрс ялгаатай болно гэж амласан. Хуулийн дагуу прокурорын албыг хамгийн өндөр дээд түвшнээс буюу Прокурорын ерөнхий албанаас эхлэн өөрчилж байгаад ялгаа нь оршиж байгаа юм байна. Прокурорын ерөнхий газрыг Ерөнхий прокурорын офис болгон өөрчилж, энэ удирдах албаны бүх ажилтнууд хоёр гурван шатлалтай аттестатчлал шалгалт өгч, шударга журамтай гэдгээ нотолсны дараа ажилдаа жинхлэгдэнэ. Ингэж хамгийн дээд шатны удирдах албыг шинэчлэн цэвэрлэсний дараа мужийн прокурорын албадыг цэвэрлэж, тэндээсээ тойргийн прокурорын албадын цэвэрлэх гэх мэтээр дээрээс доош чигтэй явах юм байна.
Сэтгэгдэл (0)
Сэтгэгдэл бичигдээгүй байна