АНУ-ын Төрийн департаментаас хакеруудын "Evil Corp" нэртэй бүлэглэлийн толгойлогч ОХУ-ын иргэн Максим Якубцын талаарх үнэн бодит мэдээлэл өгсөн хүнд таван сая долларын шагнал өгөх тухайгаа албан ёсоор мэдэгджээ. Якубцыг арваннэгдүгээр сарын 12-нд Америкийн Питтсубург хотод кибер луйврын хэрэг үйлдсэн гэж ял тулгаад байгаа аж. Максим Якубцыг одоогоор Москвад амьдарч байгаа гэж таамаглаж байгаа юм байна. Америкт болсон кибер луйврын хэргийг мөрдөж, буруутныг тогтоох ажилд Оросын тал тодорхой хэмжээгээр тус болсон гэдгийг АНУ-ын Сангийн яам онцолжээ. Мөн ОХУ-ын иргэн өөр нэг хакерыг бас эрэн сурвалжилж байгаа аж.
Энэ хоёр хакер нь бусдын компьютер дээр "Bugat" нэртэй мэдээлэл нууцаар цуглуулдаг программ хангамж суулгах замаар бусдын мөнгө өмч хөрөнгийг луйвардан авдаг байсан гэж "Reuters" агентлаг мэдээлсэн байна. "Evil Corp" нэртэй бүлэглэл нь 2011 оноос хойш үйл ажиллагаа явуулахдаа 70 сая гаруй долларын хохирол учруулсан гэж шинжээчид тооцсон байна. Иймд Америкийн эрх баригчид "Evil Corp" бүлэглэлийг хамгийн аюултай бүлэглэлүүдийн нэг, сүүлийн арван жилийн хугацаанд хийгдсэн хамгийн их уршиг дагуулсан хакеруудын дайралтын ард байгаа гэж үзэж байгаа аж.
АНУ-ын эрх баригчид арванхоёрдугаар сарын 5-нд "Evil Corp" бүлэглэлтэй холбоотой Орос ба Украйны иргэншилтэй 17 хүний эсрэг хориг арга хэмжээ аваад байсны дотор эрэн сурвалжилж байгаа хоёр этгээд ч багтсан байжээ.
Сэтгэгдэл (0)
Сэтгэгдэл бичигдээгүй байна