Францын Засгийн газар тэтгэврийн хуульд өөрчлөлт оруулахаар шийдсэнийг эсэргүүцсэн Парис хотноо болсон ажил хаялт, эсэргүүцлийн жагсаалын үеэр жагсагчид Ерөнхийлөгч Макроны чихмэлийг шатаажээ. Жагсаалын үеэр эсэргүүцэгчид ба хэв журам сахиулж байсан цагдаа нарын хооронд олон удаагийн мөргөлдөөн болсон тухай мэдээлэл ирж байна. Хамгийн сүүл ирсэн мэдээгээр цагдаа нар 71 хүнийг баривчилжээ.
Францын Засгийн газар тэтгэврийн тухай хууль өөрчлөлт оруулахдаа тэтгэвэрт гарах 42 тусгай горим гэгчийг цуцалсан байна. Эдгээр горим нь төмөр замчид, эрчим хүчний салбарынхан, хуульчид зэрэг зарим мэргэжлийн хүмүүсийг эрт тэтгэвэрт гарах, илүү тэтгэвэр авах боломж олгож байжээ.
ФрансуаМакрон нь Ерөнхийлөгч болохын өмнө тэтгэврийн насыг ахиулахгүй гэж амлаж байсан ч энэ мэтээр амлалтаа хэлбэр дээрээ зөрчөөгүй ч мөн чанартаа зөрчсөн шийдвэр гаргаж эхэлсэнд үйлдвэрчний эвлэлүүд эрс дургүйцэн ажил хаялт, эсэргүүцлийн жагсаал зохион байгуулсан аж.
Францын хуулиар тэтгэвэрт гарах доод нас нь хүйс ялгалгүй 62 байдаг. Францчуудын дундаж наслалт 82 байдгийг оруулан тооцвол тэд дэлхийн бусад ямар ч орны тэтгэврийнхээс илүү олон жил тэтгэврээрээ боломжийн амьдардаг хүмүүс. Гэхдээ бүрэн хэмжээний тэтгэвэр авахын тулд хүн 41,5 жил тасралтгүй ажиллах шаардлагатай. Ажилласан жилээс үл хамаараад бүрэн хэмжээний тэтгэвэр авахыг хүссэн хүн 67 нас хүртлээ ажиллах ёстой байдаг. Үүн дээр тэтгэвэрт гарах 42 онцгой горим зэргийг оруулбал тэтгэвэр тооцох тогтолцоо нь хэтэрхий ээдрээтэй, алдагдал ихтэй байна гэж шинжээч, мэргэжилтнүүд үзэж байгаа тул Засгийн газар тэтгэвэрт гарах доод насыг нэмэх гэж олон жилийн турш янз бүрээр оролдож байгаа юм. Гэвч тухай бүрд иргэдийн ширүүн эсэргүүцэл, тэмцэлтэй тулгарч хойшлуулсаар өдийг хүрчээ.
Сэтгэгдэл (0)
Сэтгэгдэл бичигдээгүй байна