АНУ-ын эрх баригчид энэ оны таван сараас эхлэн төрийн албадад Huawei ба ZTE гэх зэрэг Хятадын компаниудын компьютер, электрон тоног төхөөрөмж ашиглахыг хориглосон. Үүнд нь, Хятадын эрх баригчид яг адил хариу барихаар шийдсэн тухай The Financial Times мэдээлсэн байна. Хятадын коммунист намын шийдвэрийн дагуу Хятадын төрийн бүх байгууллага, албад гадаадад үйлдвэрлэсэн компьютерын техник, программ хангамжийг Хятадын Huawei ба ZTE–ийн адил зориулалттай техник, программаар солихоор болсон байна.
100 хувь Хятадын техник, программ хангамж руу шилжихэд төрийн байгууллагад гурван жилийн хугацаа гаргаж өгсөн гэж байна. Гадаадын, бүр тодруулбал АНУ-ын гол төлөв компьютерыг "3–5–2" гэсэн загварын дагуу орлуулна. Өөрөөр хэлбэл, 2020 онд гадаадын компьютерын 30 хувийг, 2021 онд 50 хувийг, 2022 онд үлдсэн 20 хувийг солино.
China Securities-ийн тооцон гаргаснаар энэ хугацаанд ойролцоогоор 30 сая компьютер солино. Энэ шийдвэр нь Microsoft, Dell, HP гэсэн Америкийн том компаниудад нэн тэргүүнд тун хүнд тусах төлөвтэй байгаа юм байна.
Гэхдээ Хятадын төрийн олон байгууллагад өөрийн Lenovo компанийн компьютер байдаг ч, тэдгээрийг чипийг Америкийн Intel компани нийлүүлдэг тул энэ ээдрээг яаж шийдэх нь ойлгомжгүй байгаа бололтой. Дээр нь Хятадад Windows-ыг орлуулах өөрийн гэсэн үйлдлийн систем хараахан байхгүй байгаа. Энэ зун Huawei нь Android-ыг орлуулах Harmony OS –ийг танилцуулж байсан ч энэ үйлдлийн системийг төрийн байгууллагуудад тохиромжтой эсэх нь тодорхойгүй байгаа аж.
Сэтгэгдэл (0)
Сэтгэгдэл бичигдээгүй байна