Архангай аймгийн Өндөр- Улаан сумын "Гурван гол" хөдөлгөөнөөс тус сумын нутагт ураны тусгай зөвшөөрөл олгож байгаа талаар өчигдөр мэдээлэл хийлээ. Энэ үеэр " гурвангол " хөдөлгөөний удирдах зөвлөлийн гишүүн Ц.Баярхүү "Бид дэлхийн хөгжилтэй хөл нийлүүлэх ёстой ч бидний соёлд таарахгүй зүйл олон. Түүний нэг бол уран. дэлхийн улс, орнууд уранаас татгалзаад байхад яагаад манай улс ураныг олборлох гээд байна вэ. Уран бол маш аюултай. 4.5 тэрбум жил болж байж алга болдог бөгөөд хорт хавдар үүсгэж, урагт ч нөлөөлөхүйц хөнөөлтэй. Ураны хохирлыг амссан гаднын олон улс орон бий. Манай хөдөлгөөн 2011 онд тэмцэж, Архангай аймгийн гурван сумд уран олборлох тусгай зөвшөөрлийг зогсоосон ч одоо дахин сэргээх гэж байна. Гурван сумын засаг даргыг зөвшөөрлийн бичигт нь гарын үсэг зурсангүй гэж "нукльер энержи монголиа" ХХК дарамталж байна.
Тэд "Бид 4-10 тэрбум төгрөгөө танай нутаг булчихаад байна. Та нар юугаараа төлөх юм бэ" гэсэн. Мөн Өндөр-Улаан, Чулуут, Тариат сумын засаг дарга нарыг байгаль орчны нөхөн сэргээлтийн менежментийн төлөвлөгөөн дээр гарын үсэг зураагүй гэсэн шалтгаанаар шүүхэд өгсөн. Бид засгийн газар болон Үндэсний аюулгүй байдлын зөвлөлд хандана" хэмээв. Мөн "гурван гол" хөдөлгөөний тэргүүн Г.Мөнхбаяр "Архангай аймгийн Өндөр-Улаан сум бол уул нуруу, ой тайга нь байгалийн унаган төрхөөрөө байгаа цөөн нутгийн нэг. Маш олон төрлийн ан амьтантай. Ийм нутагт яагаад ураны олборлолт явуулах гээд улайраад байгааг ойлгохгүй байна. Тэр нутагт уран олборлуулахгүйн тулд бид тэмцэнэ. Энэ бол гурван сумын биш, үндэсний аюулгүй байдалд нөлөөлөх хэмжээний асуудал. Тийм учраас засгийн газар үнэхээр тэр нутагт хайгуулын үйл ажиллагаа явуулах гэж байгаа бол хортой, хоргүйг нь судалж, баталж өгөх ёстой" гэлээ. Архангай аймгийн Өндөр- Улаан, Чулуут, Тариат сумын нутагт " Нуклер энержи Монголиа" ХХК н ь ашигт малтмалын хайгуулын 5355Х, 5359Х тоот тусгай зөвшөөрөлтэй аж.
Сэтгэгдэл (2)