Киргизийн Ерөнхий сайд Абылгазиев нь нийслэл Бишкект нэмж бас нэг дулааны цахилгаан станц барих асуудлыг судлах үүргийг эрчим хүчний салбартаа өгсөн байна. Киргизийн төрийн өмчит эрчим хүчний удирдах компанийн ТУЗ-ын тэргүүлэгч АйтматНазаров нь энэ талаар тайлбар хийхдээ 300МВтхүчин чадалтай дулааны цахилгаан станц шинээр барихад ойролцоогоор 200 сая орчим доллар шаардагдана гэж мэдээлсэн гэж байна. Гэхдээ Киргизийн төсөвт энэ мөнгийг тусгаагүй тул Засгийн газар нь төслийг санхүүжүүлэх сонирхолтой хөрөнгө оруулагчийг идэвхтэй хайж байгаа гэжээ.
Мөн шинэ дулааны цахилгаан станцын шатдаг хийгээр ажилладаг байхаар барьсан тохиолдолд төлөвлөсөн газар нь одоогоор оршин сууж байгаа иргэдийг нүүлгэн шилжүүлэх шаардлагагүй харин нүүрс ба бусад түлшээр ажилладаг байхаар хийвэл нүүлгэн шилжүүлэхээс өөр аргагүй гэж тайлбарласан байна.
Энэ зуур Киргиз нь дараа жилийн намар өвлийн халаалтын улирлын үеэр хилийн чанадаас 1 тэрбум кВт-цаг эрчим хүч импортлон авахаар төлөвлөөд байгаа гэдгийг Назаров мэдээлсэн байна. 2021 онд мөн адил хэмжээтэй цахилгаан эрчим хүч импортлох төлөвлөгөөтэй байгаа аж. Цаг агаарын өөрчлөлтийн улмаас Киргизийн усан цахилгаан станцуудыг хангадаг усан сан дах усны хэмжээ эрс багассан тул ийм арга хэмжээ авахаас өөр аргагүй болсон гэж "Tazabek" агентлаг мэдээлсэн байна.
Киргизийн цахилгаан эрчим хүчний 3/4-ийг үйлдвэрлэн гаргасан усан цахилгаан станцууд улсын төв ба өмнөд нутгуудаар гол төлөв байрласан байдаг тул усны түвшин хэвийн үед ч хэрэглэгчдийн дийлэнх нь аж төрдөг хойд нутгуудад хүргэх гэж багагүй бэрхшээлтэй тулгардаг. Дулааны цахилгаан станцын хувьд Киргизд хоёрхон ширхэг байдаг. Нэг нийслэл Бишкект, нөгөөх нь Ош хотноо бий. Энэ хоёр дулааны цахилгаан станцад шаардлагатай нүүрс, шатдаг хий, газрын тосны шаараг зэргийн дийлэнхийг Киргиз импортлон оруулж ирдэг аж. Гэсэн хэдий ч өөрсдийн нутаг дээр үйлдвэрлэсэн цахилгаан эрчим хүчийг авах нь илүү дээр гэж шийдсэн бололтой.
Сэтгэгдэл (0)
Сэтгэгдэл бичигдээгүй байна