Арванхоёрдугаар сарын 12-нд болсон парламентын сонгуулийн дараагаар Их Британийн Ерөнхий сайд Борис Жонсон эрх баригч Консерватив намын гишүүдэд хандан ялалтаа тэмдэглэхийг уриалжээ. Ерөнхий сайдын баяр хүргэсэн мэдэгдэл бүхий электрон захидлыг Консерватив намын гишүүд хүлээн авсан байна. Тус захидалд "Энэ шөнө та нар хөгжилдөн баярлалдаж байгаа гэдэгт найдаж байна. Та нар энэ сонгуулийн кампанийн хөдөлгөгч хүч байлаа. Та нар үгүй бол юу ч болохгүй байлаа" гэж бичсэн байсныг "Reuters" агентлаг иш татсан байна.
Экзитпол буюу сонгогчийн хийсэн сонголтын талаар сонгуулийн байрны гадна хэвлэл мэдээллийн хэрэгслүүдийн авдаг урьдчилсан лавлагааны мэдээгээр Жонсоны удирдаж байгаа Консерватив нам гарцаагүй ялалт байгуулна гэсэн хариу өгөөд байгаа юм. Британийн хамгийн том гурван телевизийн суваг экзитполын мэдээг олон нийтэд хүргэсний дараа Жонсон намынхандаа талархал илэрхийлэн Twitter хуудсаараа "Манай аугаа улсад санал өгсөн, сайн дураар ажилласан, парламентанд нэрээ дэвшүүлсэн та бүхэнд талархаж байна. Бид дэлхийн хамгийн аугаа ардчилсан улсад амьдарч байгаа билээ" гэж жиргэжээ.
Экзитполын мэдээгээр Борис Жонсоны нам өмнөх 2017 оны сонгуулийн дараа авч байснаас 50 суудал илүү авахаар болж байна. Ингэснээр парламентын 650 суудалтай танхимд үнэмлэхүй олонх болж, хүссэн хуулиа ямар ч саадгүй батлах боломжтой байгаа бөгөөд Жонсондамалсан ёсоороо 2020 оны нэгдүгээр сарын 31-нд Европын холбооноос гарахад саад болох зүйл үлдсэнгүй.
Сөрөг хүчний Лейборист нам нь экзитполоор 191 суудал авсан нь сонгуулиас өмнөхөөс 71-н суудлаар цөөрсөн гэсэн үг юм.
Сэтгэгдэл (0)
Сэтгэгдэл бичигдээгүй байна