Данийн цагдаа нар алан хядах ажиллагаа явуулахаар зэхэж байсан 20 зэвсэгт этгээдийг баривчилсан тухай DR зурагт радиогийн корпораци мэдээлж байна. Данийн хэд хэдэн хотын цагдаа газар хамтарсан ажиллагаа явуулахдаа улс даяараа 10 гаруй байршилд нэгжлэг хийж, алан хядагчдыг саатуулсан гэж байна. Копенгаген хотын цагдаагийн Ерөнхий мөрдөгч Йорген Берген Сков энэ талаар мэдэгдэл хийхдээ "Саатуулагдсан зарим хүнд ял тулгаад байгаа тул тэднийг удахгүй шүүхээр оруулна" гэжээ. Баривчлагдсан хүмүүсийг лалын хэт даврагсдыг бүлэглэлийн гишүүд, алан хядах ажиллагаа зохион байгуулахаар буу зэвсэг, тэсрэх бодис худалдан авахыг оролдсон гэсэн зүйл ангиар буруутгаж байгаа аж. Тусгай ажиллагаа амжилттай болж, алан хядах ажиллагааг таслан зогсоосон ч Дани улсад энэ төрлийн гэмт хэрэг гарна гэх магадлал өндөр байгааг цагдаа нар анхааруулжээ. Данийн тусгай албад 2012 онд тусгай ажиллагаа явуулж алан хядах ажиллагааг таслан зогсоож байсан. Тухайн үед Копенгаген хотын ойролцоох хоёр байранд орогнож байсан гурван этгээдийг саатуулж, автомат буу, сум хэрэглэл хадгалж байсан хэргээр ял тулгаж байжээ.
Сэтгэгдэл (0)
Сэтгэгдэл бичигдээгүй байна