Сэрэмжлүүлэг: Солонготын давааны замын огцом эргэлттэй хэсгийг АЮУЛГҮЙ болгоно уу

Орон нутгийн замд зам тээврийн ноцтой осол гарч, эрдэнэт хүний амь хохирчээ. Тодруулбал, энэ сарын 14-ний өдрийн 10.00 цагийн орчимд Архангай аймгийн нутаг дахь, Солонготын давааны огцом эргэлттэй хэсэгт Nissan Juke маркийн автомашин онхолдож, Увс аймгийн Засаг дарга Д.Батсайханы зөвлөх Д.Мягмарсүрэн, авьяаслаг морин хуурч Э.Идэрцогт нар амь насаа алджээ. Уг ослын яг өмнөхөн ОХУ-ын иргэдийн зорчиж байсан автомашин мөн осолдож, зорчигч нар тусламж хүсч байхад тухайн замаар зорчиж байсан жолооч нар зогсохгүй өнгөрч байсан талаар эх сурвалж мэдээлж байна. Ийнхүү нэг цэгт хоёр машин ойр ойрхон зайд осолдож, хоёр хүн харамсалтайгаар амиа алджээ. Солонготын даваан дахь уг огцом эргэлттэй замын хэсэгт 30 гаруй зам тээврийн осол бүртгэгдсэн мэдээлэл байна. Энэ онд л гэхэд долоон удаагийн осол гарсныг орон нутаг дахь замын цагдаагийн байгууллага мэдээлж байгаа юм. Гэтэл осол аваар олноор гардаг хэсэгт анхааруулах тэмдэг тэмдэглэгээ байдаггүй зорчигч иргэд шүүмжилж байна. Орон нутгийн автозамын аюулгүй байдлыг хангах, тэмдэг тэмдэглэгээг байршуулах ажлыг тухайн орон нутаг дахь АЗЗА хариуцах үүрэгтэй бөгөөд тэд энэ ажлынхаа төлөө төсөв мөнгө авдаг. Гэтэл замын нэг хэсэгт ийнхүү олон осол аваар бүртгэгдсээр байхад өөрчлөлт, сайжруулалт, ядаж анхааруулах тэмдэг тэмдэглэгээ байршуулахгүй байгаа нь маш том хариуцлагын асуудал юм. Түүнчлэн иргэд жолооч нарт сэрэмжлүүлэхэд, орон нутгийн замд анхаарал болгоомжтой зорчих, осолд өртсөн автомашин, зорчигчдод тусламж үзүүлдэг байхыг уриалж байна.