Амралтын өдрүүдээр 70 хүн угаарын хийнд хордсоны 41 нь хүүхэд байна

Өнгөрсөн амралтын өдрүүдэд Яаралтай түргэн тусламжийн төвд угаарын хийнд хөнгөн, хүнд хэлбэрээр хордсон гэх 16 өрхийн 70 иргэн хандаж, эмнэлгийн тусламж үйлчилгээ, зөвлөмж зөвлөгөө авсан. Үүний насанд хүрсэн хүн 29, хүүхэд 41 байгаа юм.

Өмнөх амралтын өдрүүдийг бодвол угаарын хийтэй холбоотой дуудлага мэдээлэл тасрахгүй байгааг   холбогдох газраас мэдээллэв. Учир нь иргэд   пийшин зуухны битүүмжлэлийг шалгаагүй, яндангаа хөөлөөгүй байдлаас болж дуудлага ирсээр байгааг хэллээ.

2019 оны 10 сарын 02- ны өдрөөс 12 дугаар сарын 30-ны  өдрийн байдлаар  угаарын хийнд хөнгөн, хүнд хэлбэрээр хордсон гэх  нийт 6 дүүргийн 619 өрхийн нийт 1511 иргэн / насанд хүрсэн хүн 838, хүүхэд 673/ угаарын хийд хордож , 12 хүн /насанд хүрсэн хүн 6, хүүхэд 6/  нас барсан. 

Мөн хүйтний эрч чангарч галлагаа нэмэгдэж байгаатай холбоотой пийшин, зуухныхаа битүүмжлэлийг шалгаж, сайжруулсан шахмал түлшний галлагааг зөв хийхийг иргэд, олон нийтэд албаныхан онцгойлон анхаарууллаа.