ШӨХТГ: Цахим орчинд нам, улс төрчийн чансаа тогтоохыг хориглоно

Шударга өрсөлдөөн хэрэглэгчийн төлөө газраас (ШӨХТГ) өнөөдөр хэвлэлийн бага хурал хийв. Тэд УИХ-ын сонгуулийн тухай хуулийн зарим шинэ заалтуудыг мөрдөж ажиллахыг хэвлэл мэдээллийн хэрэгслүүдэд анхааруулсан юм. Үүний сацуу УИХ-ын сонгуулийн тухай хуулийн дагуу ээлжит сонгуулийн жил эхэлснээс хойш санал авах өдрийг дуустал дараах үйл ажиллагааг хийхийг хориглохоор болжээ.

Үүнд:

• Хэвлэл мэдээллийн хэрэгсэл, цахим орон зай, мессеж ашиглан улс төрийн чансаа тогтоох зорилго бүхий аливаа хэлбэрийн шалгаруулалт зохион байгуулах
• Хэвлэл мэдээллийн байгууллага сонгуулийн сурталчилгааны үеэр аль нэг нам, эвсэл, нэр дэвшигчийн талаарх мэдээ, мэдээллийг дагнан гаргах, эсхүл гаргахгүй байхаар амлалт авах гэрээ байгуулах.

Энэ талаар ШӨХТГ-ын Өрсөлдөөний бодлого зохицуулалтын газрын дарга Т.Батцэцэг "Сонгуулийн тухай хуульд сонгуулийн жил эхэлснээс хойш хэвлэл мэдээллийн хэрэгсэл, цахим орон зайд аль нэг улс төрийн нам эвсэл, улстөрчийн чансааг тогтоосон мэдээллийг гаргахыг хориглосон. Мөн сонгуулийн сурталчилгааны үеэр аль нэг нам эвслийн мэдээллийг түлхүү гаргах эсвэл огт гаргахгүй байх гэрээ хийхийг хуулиар хориглосон.

Үүний дээр радио телевизээр зөвхөн нэг талыг барьсан мэдээлэл нэвтрүүлэхийг хориглоно.  Сонгуулийн тухай хуулийн эдгээр заалтыг зөрчсөн тохиолдол хэвлэл мэдээллийн байгууллагын тусгай зөвшөөрлийг сонгуулийн дүн гартал түр хугацаанд түдгэлзүүлэх хүртэл арга хэмжээ авах юм" гэлээ.