Д.Сэржмядагийг эрэн хайх ажиллагааны хүрээнд зургаан хүүхэд бэлгийн хүчирхийлэлд өртсөнийг нөхөн илрүүлжээ

Дорноговь аймгийн Замын-Үүд суманд найман настай Д.Сэржмядаг охин 2017 оны арваннэгдүгээр сарын 2-ны өдөр хичээлдээ явахаар гараад сураггүй алга болсон билээ. Энэ хугацаанд автомашин болон галт тэргээр зорчин Замын-Үүдээр дамжин өнгөрсөн 550 иргэнээс мэдүүлэг авсан байна. Мөн 32 мянган тээврийн хэрэгслийн мэдээллийг авч шалгаж байна. Энэ хэргийн хүрээнд бага насны хүүхдийг хүчиндсэн, бэлгийн дур хүслээ ёс бусаар хангасан зургаан хэргийг нөхөн илрүүлсэн байна. Үүний дөрвийнх нь мөрдөн шалгах ажиллагааг дуусгаж, шүүх байгууллагад шилжүүлжээ. Харин хоёр хэргийнх нь мөрдөн шалгах ажиллагаа явагдаж байна. Д.Сэржмядаг охин алга болсон хэргийн шалгах ажиллагаа үргэлжилж байгаа ч тодорхой үр дүн гарахгүй байгааг цагдаагийн байгууллагаас хэлж байна. Нэмж мэдээлэхэд, 2019 онд хүүхэд сураггүй алга болсон гэх 1024 дуудлага мэдээлэл цагдаагийн байгууллагад ирсний 2012 нь олж, эцэг эхэд нь хүлээлгэн өгсөн байна. Харин 12 хүүхдийг эрэн хайх ажиллагаа үргэлжилж байна. Эдгээр хүүхдүүд өмнө нь 1-5 удаа гэрээсээ дайжиж, сураггүй алга болсон хүүхдүүд болох нь бүртгэгджээ.