Шүүхийн шинжилгээний үндэсний хүрээлэнгийн эмч нар шинжилгээ будилуулсан нь тогтоогдсон, авлигын эрсдэлээс хэрхэн хамгаалдаг зэрэг асуудлаар манай сэтгүүлч Ц.Анхзул ШШҮХ-ийн Шинжилгээний бүртгэл мэдээллийн хэлтсийн чиглэлийн ахлах мэргэжилтэн Б.Эрдэнэхүүтэй ярилцаж байна.
Угаарын хийн судалгааны хэдэн хүнд шинжилгээ хийсэн бэ?
-2018 онд 76, 2019 оны статистик гараагүй байна. Угаарын хий нь манай байгууллага дээр ирэхдээ зөвхөн шахмал түлш гэлтгүй, гараж дээр угаартаж байна, траншейд ч гал түлж байгаад угаартсан хэрэг гэх мэт зүйлс манайд орж ирдэг. Тэгэхээр энэ талаар бодит мэдээлэл авья гэвэл Онцгой байдлын газарт хандсан нь дээр байх.
-Танай байгууллагад үзлэг шинжилгээ хийлгэхээр хэдэн хүн ханддаг юм бэ?
-Гол төлөв гэмтлийн зэрэг тогтоолгохоор ирдэг. Дундажлаад үзэхээр 40-60 хүн ирдэг.
-Мөн амь насаа алдсан хүн танайд ирдэг. Энэ талаар.
-Сүүлийн нэг сарын хугацаанд 200 орчим талийгаачид шинжилгээ хийлгэсэн. Гэмтлийг зэрэг тогтоолгох 1200 хүн ирж үйлчлүүлсэн.
-Танай байгууллагаас гурван хүн шүүхээр шийтгэл авсан гэсэн?
-Манайд шүүхээс албан ёсны мэдэгдэл ирээгүй байгаа. Ийм тогтоол ирэхээр хариуцлага тооцох байх. Ирээгүй байхад нь ярих боломжгүй байна.
-Ямар хариуцлага тооцох вэ?
-Манай байгууллага дээр тогтоол ирээгүй байна. Мөн би тэр талаар мэдээлэл өгөх бүрэн эрх бүхий хүн биш.
Шүүхээс хүчин төгөлдөр тогтоол ирсний дараа л тодорхой арга хэмжээ авах боломжтой.
-Цогцос солигдсон хэрэг гарч байсан. Энэ талаар?
-Бид шалгалт хийгээд манай байгууллагад ямар ч буруу байхгүй. Тэр таних ёстой хүмүүс нь буруу таньсан гэдэг нь тогтоогдсон. Камерын бичлэгээр хүртэл баталгаажсан.
-ХНХ-ын ажилтан Болороогийн талийгч нөхрийн шинжилгээний талаар?
-Тухайлсан хэрэгт холбоотой шинжээчийн дүгнэлтийг хэлэх хориотой, мөрдөн байцаалтын нууц гэж явдаг. Энэ талаар хэлэх боломжгүй.
-Хохирогч танайхаар шинжилгээ хийлгээд хариуг нь зөвшөөрөхгүй тохиолдолд танайд шинжилгээ хийсэн эмч нарт шалгалт хийдэг үү?
-Шинжээч гаргасан дүгнэлтдээ өөрөө хариуцлага хүлээнэ. Манайх ажилд авахдаа АТГ-аас ашиг сонирхлын зөрчлийг шалгуулдаг, ашиг орлогын мэдүүлэг жил болгон авдаг. Мөн авлигын талаар сургалт явуулдаг.
-Танай байгууллагад итгэх иргэдийн итгэл бага байна. Хэн мөнгөтэй, нэр нөлөөтэй хүнд үйлчилж байна гэсэн эргэлзээ байна?
-Шинжээч өөрөө хараат бус байх хуулийн заалттай. Тангараг өргөсөн хүн. Мөн сургалт байнга хийж байна. Хамгийн сүүлд Ил тод хариуцлагатай байгууллага гэсэн сургалт хийсэн.
Сэтгэгдэл (0)
Сэтгэгдэл бичигдээгүй байна