ЭМЯ: Ухань, Хонгконгоос ирсэн оюутнуудын шинжилгээний хариу сөрөг гарсан

ДЭМБ-ын Монгол дах суурин төлөөлөгч Сергей Диордица:

-Дэлхийн хэмжээнд тохиолдлын тоо нэмэгдсээр байна. Арабын Эмиратад батлагдсан дөрвөн тохиолдол бүртгэгдсэн. ОУ-ын тээвэр зорчигчтой холбоотой заавар журмыг ДЭМБ-аас өөрчилсөн. Хятадаас гарах хилийн цэг дээр хяналт шалгалт хийхийг зөвлөж байна. Өмнөх дэгдэлтийн туршлагаас харахад хил дээрх хяналтын үр дүн тодорхой бус байсан. Иймд эмнэлэгт хандах нь илүү чухал болж байгаа. Тохиолдлын тоо тасралтгүй нэмэгдэж, Хятадад очоогүй хүмүүсийн дунд халдварлах явдал бүртгэгдсэн тул ОУ-ын дүрмийн дэргэдэх онцгой комисс өнөөдөр дахин хуралдахаар болсон. Японы ХӨС-ын хүрээлэнгээс оношлуур авсан, одоо ДЭМБ-аас дараагийн захиалга авахаар ажиллаж байна.

Халдварын тархалтаас сэргийлэх ажлыг богино хугацаанд хийж байгаа эмч, ажилтнууддаа талархаж байгаагаа илэрхийлье.

ХӨСҮТ-ийн Ерөнхий захирал, доктор Д.Нямхүү:

-ХӨСҮТ дээр 14 тохиолдол ирсэн. Ухань хотод сурч байсан 4 оюутан, Бээжингээс ирсэн 1 тохиолдол, Хонконгоос ирсэн 4 тохиолдлуудыг 28-нд тусгаарласан. Тэдэнд  шинжилгээ хийхэд бүгд сөрөг гарсан учраас зөвлөгөө өгөөд гаргасан. Өчигдөр 4 тохиолдол ирсэн шинжилгээ хийсэн. Хариу нь өнөөдөр гарна. Манай зарим иргэд өөрсдөө голомттой нутгаар аялаад ирсэн гэж шинжилгээ өгөхөөр ирсэн.

ДЭМБ-аас шинэ оношлуур нэмэлтээр ирүүлэхээр болсон. Сарангэрэл сайд оношлуурын захиалгыг явуулсан. Бидний тооцоогоор 2500 ширхгийг захиалсан удахгүй ирнэ.

Өвчин агаар дуслын замаар, контактаар халдварлаж байгаа тул маск зөв зүүх хэрэгтэй. Гудамжаар явахдаа нус цэрээ ил хаяхгүй байх хэрэгтэй. Ханиахдаа амаа дарж байх хэрэгтэй. Мэндлэхдээ гар барилгүй тохойгоо хүргэлцэж болж байна. Хятадад бээлий өмсдөг явдал түгээмэл болж байна. Гуравдугаар сарын 2-н хүртэл амар гээд байгаа юм биш биеэ бод, дархлаагаа сэргээ хөдөө орон нутагт цэвэр агаараар контакт, хавьтлаас хол байх боломж олгож байгаа хэрэг юм. Энэ мэт энгийн зөвлөгөөг ягштал дагаж мөрдвөл эрүүл явах боломжтой.

Сошиал дээр гарсан ямар ч шүүлтгүй мэдээлэлд битгий автаач ээ. Хуурамч мэдээлэл түгээх нь эх орондоо гай тарьж байгаа хэрэг юм. Эх оронч хүмүүс маскныхаа үнийг нэммээргүй байна, ариутгалын бодисоор нууж нөөцөлмөөргүй байна.

-Лабораторийн хариу хэдий хугацаанд гарах вэ?

ХӨСҮТ-ийн Ерөнхий захирал, доктор Д.Нямхүү:

-24 цагийн дотор гарна. Манайх 21 төрлийн вирусийг илрүүлэх оношлууртай. Сая Японы тусламжтайгаар авсан оношлуураа хэрэглэнэ. Эцсийн дүн 24 цагийн дотор гарна, явцын дүнг лабораторийнхон хоорондоо мэдээлэл солилцож явдаг.