Москвагийн метронд коронавирусээр өвдсөн хүн болж жүжиглэн, эмх замбараагүй байдал үүсгэсэн гурван хүнийг Оросын цагдаа нар баривчилсан байна. Тэдний нэг нь метроны вагон дотор худал ухаан алдан татаж жүжиглэхэд, бусад нь коронавирустэй хүн байна гэж олныг айлгаж сүрдүүлсэн бөгөөд үүнээс болж олон хүн үймэлдэн сандарсан хэрэг гарсан. Энэ бүхнийг хамсаатнууд нь видео бичлэг болгон интернэтээр цацаж, олон мянган лайк даруулсан. Иймэрхүү байдлаар хүмүүсийг өдөөн хатгаж, тоглом тохуу хийдэг хүмүүс өөрсдийгөө пранкерууд гэдэг. Тэд “Youtube” гэх мэт видео хостинг дээр сувагтай, түүндээ метронд хийсэнтэй адил жүжиглэлтийн бичлэгээ байршуулан олон зуун мянга, заримдаа олон сая дагагчтай болсон байдаг. Хэдий олон дагагчтай байна тэр хэмжээгээр нь их реклам сурталчилгаа авч, элбэг тансаг амьдарцгаадаг.
Тэдний энэ мэт үйлдэл гол төлөв ямар ч шийтгэл, зэмлэлгүй өнгөрдөг ч Москвагийн метронд хийсэн янз үзэлтийн бичлэгийг нь цагдаа нар сонирхож, гурван зохион байгуулагчийг нь баривчилсан байна. Учир нь, метро бол эмх замбараагүй байдал үүсвэл олон хүн дарагдаж, шахагдан амиа алдах өндөр эрсдэлтэй газар. Үүнийг мэдсээр байж хүмүүсийг зориуд айлгаж, сандаргасныг эрүүгийн хэрэг үүсгэх шалтгаан гэж тооцсон байна. Тэдэнд “нийтийн тээврийн хэрэгсэл дотор танхайрсан” гэсэн зүйл ангиар эрүүгийн хэрэг үүсгээд байгаа бол залгуулаад “бүлэг этгээд урьдчилан үгсэн тохиролцсон дагуу” гэсэн зүйл анги нэмэхээр болсон байна. Энэ хоёр зүйлээр буруутай гэж үзвэл 7 жил хүртэл хорих ялаар шийтгэх аж.
Сэтгэгдэл (0)
Сэтгэгдэл бичигдээгүй байна