Коронавирусийн тархалтын онцгой байдалтай холбоотойгоор зарим гэмт хэрэгт цаазаар авах ял ногдуулж болохыг анхааруулсан мэдээг Бээжин хотын дунд шатны хоёрдугаар шүүхээс тараажээ. Өвчний тархалт энэ сарын сүүлээр оргил үедээ хүрэх тооцоо байгаа тул эрх баригчид арга хэмжээгээ улам чангалж эхэлсний шинж тэмдэг гэж шинжээчид дүгнэсэн байна.
Тухайлбал, коронавирусийн халдвар авсан нь нотлогдсон хэдий ч эмчилгээ хийлгэх ба тусгаарлахаас татгалзсан, хөл хорионы дэглэмийг дураар зөрчсөн хүмүүст цаазаар авах ял онооно гэдгийг анхааруулсан. Түүнчлэн халдвар авсан байж магадгүй сэжигтэй гэж бүртгэгдсэн хэдий тусгаарлагдах ба эмчилгээ хийлгэхээс татгалзан олон нийтийн газраар ба нийтийн тээврээ явж өвчин тараасан нь тогтоогдвол цаазаар авна гэдгийг онцгой сануулжээ.
Түүнчлэн тахлын үеэр эмнэлгийн ажилтнууд руу ноцтой үр дагавар бүхий гэмтлийг санаатай учруулсан эсвэл эмнэлгийн ажилтнуудын хамгаалалтын хувцсыг санаатай гэмтээж эсхүл эмнэлгийн ажилтан руу нулимаж коронавирус халдаавал цаазаар авна гэдгийг сануулсан байна. Эмнэлгийн ажилтнууд руу дайрч давшлах, хэл амаар доромжлох тохиолдол цөөнгүй гарч учраас энэ төрлийн хэргийг урьдчилан онцгой анхааруулсан бололтой.
Мөн халдварын үеэр ашиг хонжоо хайсан албан тушаалтнуудад зориулж, коронавирустэй тэмцэхэд зориулсан хөрөнгө, мөнгийг буруугаар ашигласан, шамшигдуулсан тохиолдолд цаазаар авна гэдгийг анхааруулжээ.
Эцэст нь тахлын үеэр эм, эмийн бэлдмэл үйлдвэрлэдэг ба худалдаалдаг компаниуд хуурамч эсвэл чанаргүй бүтээгдэхүүн нийлүүлж, зарж борлуулсан нь тогтоогдвол цаазаар авна гэдгийг урьдчилан сануулжээ.
БНХАУ-ын эрх баригчид хуулийг ягштал хатуу чанд дагаж мөрддөг гэдгээрээ алдартай тул анхааруулга хоосон үг төдий биш гэдэгт хэн ч эргэлзэхгүй байгаа аж.
Сэтгэгдэл (0)
Сэтгэгдэл бичигдээгүй байна