Д.Нямхүү: “Берлин-Улаанбаатар” нислэгээр ирсэн хоёр иргэнээс шинэ коронавирус илрээгүй

Өнөөдөр /2020.03.07/ ЭМЯ болон ХӨСҮТ хамтарч шинэ коронавирусийн халдварын талаарх цаг үеийн ээлжит мэдээллээ хийлээ. Энэ үеэр ХӨСҮТ-ийн захирал Д.Нямхүү,

“Өчигдөр буюу гуравдугаар сарын 6-ны өдөр ХӨСҮТ-д гурван хүн тусгаарлаж, үзлэг шинжилгээ хийсэн. Тэднээс шинэ коронавирус илрээгүй. Берлин-Улаанбаатар чиглэлийн нислэгээр ирж, халуурах, ханиалгах шинж тэмдэгтэй байсан хоёр иргэн үүнд багтана.

Энэ хоёр иргэнээс болон Австрали улсаас ирсэн эмэгтэйгээс шинэ коронавирус илэрсэн мэт худал мэдээлэл түгсэн. Ийм байдлаар төрийн ажилд битгий саад болоорой гэдгийг зориуд онцлон тэмдэглэмээр байна.

Өчигдөр ХӨСҮТ-д хоёр, Багабаян дахь сувиллын газарт 12, Дархан-Уул аймагт гурав, Дорноговь аймагт долоо, Өмнөговь аймагт нэг, нийт 25 хүнийг ажиглалтад аван тусгаарласан” гэлээ.