Энэ сарын нэгэн болон наймны өдрүүдэд Гёнги муж Соннамд байрлах “Нигүүлслийн гол” хэмээх сүмийн цуглаанд оролцсон 40 иргэн коронавирусийн халдвар авсан байна. Иргэд ингэж олноороо коронавирусийн халдвар авах болсон шалтгааныг тодруулан тус сүмийн хяналтын камерыг шалгахад цуглаанд ирсэн итгэгчдийн ам руу савтай давстай ус цацаж байсан нь илэрсэн аж. Мөн давстай ус цацахдаа ямар ч ариутгал хийлгүй нэг иргэнээс нөгөө иргэний ам дамжуулан цацсан байна. Уг цуглаанд 130 гаруй иргэн явдаг бөгөөд дээрх өдрүүдэд 100 гаруй итгэгч сүмд очжээ. Тиймээс цаашид коронавирусийн халдвар авсан иргэдийн тоо нэмэгдэх хандлагатай байгаа юм. Өмнө нь мөн Сөүл хотод байрлах нэгэн дуудлагын төвөөс мөн 124 иргэн коронавирусийн халдвар авсан тохиолдол гарч байсан билээ. Хэдийгээр БНСУ-д өвчний дэгдэлт багасаж байгаа ч иргэд олноороо цугласан газар очих ямар нэгэн цуглаан, уулзалт хийх нь эрсдэлийг нэмэгдүүлж байгааг анхааруулж байгаа юм.