Оюутолгойгоос авах их наядын татварыг уучилсан гэх Монголын дарга нар өнөөдөр ял сонсож магадгүй

“Оюутолгой”-н  татвар, Дубайн гэрээ, С.Баярцогтын үндэслэлгүйгээр хөрөнгөжсөн гэх хэрэгт  С.Баярцогт,  Д.Ганболд,  Б.Бямбасайхан, Ч.Ариунсан, Б.Бадрал нарын таван хүнд холбогдох хэргийн шүүх хурал зургаа дахь өдрөө  “Баянзүрх, Чингэлтэй, Сүхбаатар”  дүүргийн Эрүүгийн  хэргийн шүүхийн танхимд үргэлжилнэ. Өнөөдөр буруутай этгээдүүдэд ял оноож, шүүх хурал дуусч магадгүй. Эдгээр таван хүнийг тус тусад нь өөр өөр үйлдлээр буруутгаж байгаа бөгөөд огтлолцол нь Оюутолгой болж таарч буй. АТГ-ын найман хүний бүрэлдэхүүнтэй шинжээчдийн баг ажиллаж 2006-2015 онд “Оюутолгой”  ХК-иас 965,2 тэрбум төгрөгийн татварыг Монгол улс авах ёстой байсныг  тогтоожээ. Гэвч албан тушаалтнууд тус компани эрх мэдлээ урвуулан ашиглаж, татвараас бултах боломжийг олгосон гэж буруутгаж байгаа юм. Тодруулбал “Сангийн яам”-ны  Улсын төсвийн орлогын хяналтын газар, “Татварын ерөнхий газр”-ын  хамтарсан шалгалтаар 

2009 онд 345,7 тэрбум төгрөгийн татварын акт
2010 онд 11,5 тэрбум 
2013 онд 377 тэрбум 
2014 онд 231 тэрбум төгрөгийн актыг тус бүр тавьжээ. Улмаар  “Оюутолгой”  ХК-ийн зүгээс татварын байцаагчийн тавьсан актыг хүлээн зөвшөөрөхгүй,  шүүхээр явж асуудлыг шийдүүлж байжээ.  
Б.Бямбасайхан, Д.Ганболд нарыг  Оюутолгойн бүтээн байгуулалтын гэрээг байгуулсан гэдгээр буруутгаж байгаа аж. Сангийн сайд асан С.Баярцогтыг үндэслэлгүйгээр хөрөнгөжсөн, мөнгө угаасан байж болзошгүй гэх үндэслэлээр буруутган шүүж байгаа юм. Шүүгчээр Ё.Цогтзандан ажиллаж байна.